Еквадорскиот претседателски кандидат Фернандо Вилависенсио беше убиен од огнено оружје на крајот од предизборниот митинг вчера вечерта во Кито, а извршителот на убиството набрзо е идентификуван, но им подлегна на повредите при апсењето.
На видеата од митингот, објавени на социјалните мрежи, се гледа како луѓе трчаат и врескаат додека се слушаат пукотници во кои е убиен 59-годишниот Вилависенсио.

„Осомничениот сторител почина од повреди здобиени при апсењето“, објави Јавното обвинителство на „Х“.
Партијата на Вилависенсио во објава, исто така на „X“, соопшти дека вооружени лица ги нападнале нејзините канцеларии во Кито.
„Во спомен на неговата борба, ве уверувам дека ова злосторство нема да остане неказнето“, напиша претседателот Гиљермо Ласо на социјалната мрежа.
Тој додаде дека организираниот криминал во земјата „отишол многу далеку“ и им порача на сторителите дека „целата тежина на законот ќе падне врз нив“.
Ласо најави свикување итен состанок на високи безбедносни функционери.

Според испитувањата на јавното мислење, Вилависенсио имал поддршка од 7,5 отсто од гласачите, што го сврстувало на петтото место меѓу осумте претседателски кандидати во првиот круг од претседателските избори, закажани за 20 август.
Вилависенсио, од провинцијата Чимборазо на Андите, беше поранешен член на синдикатот во државната нафтена компанија „ПетроЕквадор“, а подоцна како новинар укажа на наводните милионски загуби во нафтените договори.
Поврзано со нафтениот бизнис, тој во вторникот поднесе пријава до Државното обранителство, но деталите од неговата пријава не се соопштуваат.
Вилависенсија беше изложен на тешки критики од опозициските политичари за попречување на процесот на импичмент на Ласо оваа година, по што беа распишани предвремени избори.
„Денес, повеќе од кога било, се повторува потребата да се дејствува силно против криминалот“, напиша Јан Топик, претседателски кандидат.
Претседателката на Националниот изборен совет, Дијана Атамаинт, вчера објави дека неколку членови на тоа тело, одговорно за следење на гласањето, добиле смртни закани.
(Фото: АФП)







