Вчера, на Меѓувладината конференција во Брисел, Црна Гора привремено затвори уште две преговарачки поглавја со Европската унија (ЕУ), со што бројот на затворени поглавја се зголеми на 25 од вкупно 33.
Затворени се поглавјата 16 – Даноци и 22 – Регионална политика и координација на структурните инструменти, соопшти Советот на ЕУ.
Ирскиот државен министер за европски прашања, Томас Бирн, во име на ирското претседавање со Советот на ЕУ, оцени дека денешниот напредок ја потврдува посветеноста кон проширувањето на Унијата и дека целта на Црна Гора да ги затвори сите преговарачки поглавја до крајот на годината е сè уште остварлива.
Тој изјави дека за време на ирското претседавање биле затворени девет поглавја, како и дека Европската комисија, во неодамна објавениот патоказ, оценила оти Црна Гора ги исполнила сите завршни критериуми за затворање на преговорите.
Министерката за европски прашања на Црна Гора, Маида Горчевиќ, изјави дека успехот се заснова на заслуги и дека реформите можат да ги доведат земјите-кандидати до членство.
„Привременото затворање на овие поглавја ќе значи и исполнување на одредниците. Ќе направиме сè што Европската комисија ќе оцени дека е потребно“, рече Горчевиќ.
Горчевиќ истакна дека прашањата во преговорите со Хрватска се решаваат на високо ниво.
„Сакаме да ги решиме сите спорови со Хрватска пред зачленувањето и на тој начин да докажеме дека нема да создаваме никакви проблеми со влезот во ЕУ“, изјави министерката.
Европскиот комесар за проширување, Марта Кос, изјави дека од почетокот на годината се затворени 13 поглавја.
Таа посочи дека Црна Гора се наоѓа на третото место според бројот на поглавја затворени во текот на една година, зад Литванија и Латвија, при што постои голема веројатност дека ќе ги надмине.
„Денешното достигнување е резултат на долгогодишна работа и доказ за тоа што може да се постигне кога политиката и интересите ќе се стават настрана“, рече Кос.
Таа нагласи дека Црна Гора ги исполнила условите за затворање на сите преостанати поглавја до крајот на годината.
Извор: Данас
Фото: принтскрин







