Внатрешна контрола во МВР, по извршувањето на потребните проверки во врска со настанот од 11 август во Струмица, каде што полицаец рани двајца малолетници, утврдил дека полицискиот службеник неосновано, неоправдано и неправилно употребил огнено оружје врз лицата Д.Т. и А.Г. и постапил спротивно на одредбите од Законот за полиција.
Против него е поведена дисциплинска постапка пред надлежната комисија во МВР и со решение на министерот Спасовски полицаецот ќе биде отстранет од работното место до завршување на дисциплинската постапка.
До надлежниот јавен обвинител била поднесена и кривична пријава за обид за убиство.
Од МВР информираат дека најостро ги осудуваат обидите за манипулација со овој настан.
„За разлика од времето кога раководството на МВР ги криеше злосторствата од јавноста, МВР сега демонстрира максимална транспарентност и професионално работење со цел да обезбеди законите да важат подеднакво за сите, се вели во соопштението на МВР.
