Европската фудбалска унија го претстави денес новото натпреварување на репрезентации наречено Лига на нациите, кое треба да почне во 2018 година.
УЕФА натпреварувањето го претстави на заседанието на својот Извршен одбор во Нион и оцени дека тоа ќе ги замени скоро сите пријателски натпревари.
Во Лигата на нациите ќе учествуваат 55 репрезентации, кои ќе бидат поделени во четири квалитативни групи (А,Б,Ц,Д), а секоја од нив во дополнителни три до четири подгрупи со по три или четири репрезентации.
Во најсилниот ранг ќе учествуваат 12 репрезентации поделени во четири групи, чии победници ќе изборат пласман на завршниот турнир на Лигата на нациите во 2019 година.
Групите ќе се пополнуваат врз основа на ранг листата на УЕФА од ноември оваа година.
Најдобриот од секога група ќе се сели во повисок ранг, а најслабите ќе одат во понизок, додека четирите најдобри екипи од Лигата на нациите ќе изборат директен пласман на Европското првенство во 2020 година.
„Подмладувањето на репрезентативниот фудбал дојде од желбата на УЕФА, особено од нејзиниот претседател, да го унапреди квалитетот и угледот на репрезентативниот фудбал. Сојузите, тренерите, играчите и навивачите се повеќе мислат дека пријателските натпревари не донесуваат адекватно натпреварување на националните тимови“, наведе меѓу другото УЕФА во образложението на оваа одлука.
Натпреварите по групи во Лигата на нациите ќе се играат во септември, октомври и ноември 2018 година, во веќе постоечките репрезентативни термини.
Секоја репрезентација би играла по два натпревари, еден во квалификациите за ЕП, а вториот во Лигата на нациите.
ЕП 2020 ќе се игра по прв пат во 13 градови во различни држави во Европа и на тој начин ќе се одбележи 60-годишнината од ова натпреварување.
Натпреварите ќе се играат во Амстердам, Баку, Билбао, Брисел, Будимпешта, Букурешт, Даблин, Глазгов, Копенхаген, Минхен, Рим и во Санкт Петербург.
Полуфиналето и финалето ќе се играат на лондонски Вембли.
