Од Ковид-19 во светот починале над 1,9 милиони луѓе

Последните податоци  во светот покажуваат дека од последици на коронавирусот починале повеќе од 1,9 милиони луѓе.

Најголем број смртни случаи се потврдени во САД – 373.069, каде во изминатите 24 часа починале над 4.000 лица, што е најмногу во еден ден од почетокот на пандемијата. На второ место се наоѓа Бразил, каде досега починале над 200.000 луѓе. Во доцната фаза на клинички испитувања спроведени во Бразил, вакцината против Ковид-19, која ја разви кинеската компанија Синовак, покажа ефикасност од 78 отсто. Бразилскиот Институт Бутантан очекува 46 милиони дози од вакцината да бидат достапни овој месец, доколку биде одобрено од Националната агенција за лекови.

На трето место по бројот на починати е Индија со повеќе од 150.000 жртви, а на четврто место се наоѓа Мексико со речиси 130.000 смртни случаи.

Во Европа најголем број починати од коронавирус има Велика Британија – 78.508, следува Италија со повеќе од 77.000, потоа Франција со 66.841, Русија со над 60.000 и Шпанија со околу 52.000 смртни случаја.

Во светот од почетокот на пандемијата на Ковид-19 се заразени повеќе од 88 милиони лица, а вакцинацијата која започна кон крајот на минатата година во повеќето земји во светот, дава надеж дека заразата ќе биде спречена во текот на 2021 година.