Истражувачи открија докази дека на Марс во далечното минато имало огромни подземни магматски басени слични на оние на Земјата. Тоа го оспорува досегашниот долгогодишен став дека внатрешноста на Црвената Планета била релативно едноставна.
Научниот труд, објавен во списанието „Нејчр астрономи“ (Nature Astronomy) минатиот месец, анализира сеизмички податоци собрани од приземјувачот „Инсајт“ (InSight) на НАСА од последици од земјотресите на Марс и ударите на метеорити. На тој начин, научниците идентификувале граница околу 24 километри под површината што, се чини, ги одделува карпите богати со силициум-диоксид од подлабоките карпи богати со железо и магнезиум, што пак, посочува дека магмата некогаш се акумулирала и еволуирала длабоко во кората на Марс.
Истражувањето го водеше првенствено Одделот за науки за Земјата при Универзитетот Оксфорд во соработка со Универзитетот на Бристол.
Така, научниците велат дека наодите укажуваат дека Марс можеби одржувал големи, меѓусебно поврзани магматски басени, а не самостојни вулкани, и покрај тоа што немало подвижни тектонски плочи, какви што ја обликуваат геологијата на Земјата.
Слични процеси на Земјата се поврзани со обликувањето на континентите и „рециклирањето“ на материјалите од кората. Според научниците, откритието укажува дека сложените кори можат да се развијат на карпести планети без тектоника, зголемувајќи ја така можноста дека условите поволни за живеење може да бидат почести во универзумот отколку што мислат некои научници.
