Четири години пишувала пораки на починатиот татко, па стигнал одговор „од другата страна“

Дваесет и тригодишната Честити Петерсон четири години откако починал човекот што се грижел за неа испраќала пораки на неговиот број. А, тогаш добила одговор од човек кој си ја загубил ќерката во сообраќајна несреќа.

„Тато, тоа сум јас! Утре пак ќе имам тежок ден“, напишала Честити во СМС пораката која ја испратила на бројот што го користел нејзиниот татко, вечерта пред четвртата годишнина од неговата смрт.

Веќе четири години секојдневно му испраќала пораки со вести од својот живот, настојувајќи така да задржи некаква врска со нив. И овој пат во пораката напишала колку и било тешко во текот на четирите години колку што го нема, во текот на кои и покрај се добила битка против рак и успеала да заврши факултет, не очекувајќи ништо. А тогаш стигнал одговор!

„Здраво, душо! Јас не сум твојот татко, но ги добив сите твои пораки во текот на овие четири години. Се радувам на твоите утрински пораки и вечерните јавувања. Се викам Бред и ја загубив ќерката во сообраќајна несреќа во август 2014 година и твоите пораки ме одржаа во живот. Кога ќе ми испратиш порака, знам дека тоа е порака од Господ“, и одговорил Бред во својата порака.

„Жал ми е што си загубила некој толку близок. Ги читав твоите пораки и видов како растеш и минуваш низ проблеми кои многу луѓе ги немаат. Многу пати сакав да ти одговорам, но не сакав да ти го скршам срцето“, напишал Бред и ја пофалил Честити за тоа како напредува. Ја нарекол свој ангел, откако ја загубил сопствената ќерка во сообраќајна несреќа.

Ти си прекрасна жена и сакав мојата ќерка да може да стане како тебе. Ти благодарам за секојдневните пораки, ме потсети на тоа дека има Господ и дека не е негова грешка тоа што моето мало девојче повеќе го нема. Ми те подари тебе, мој мал ангелу. Знаев дека ќе дојде овој ден. Се ќе биде во ред, само уживај во секој ден и зрачи на нас со светлоста што Господ ти ја дал. Жал ми е што мораш да поминеш низ ова, ако тоа нешто ти значи, многу сум горд на тебе“, напиша, исто така, Бред во одговорот на девојката.

Длабоко погодена, Честити го сподели тој одговор на Фејсбук, каде што за кусо време го прочитаа повеќе од 265.000 луѓе.

Таа напиша: „Секој ден во изминатите четири години му пишувам пораки на својот татко, за да знае како сум. Денес добив знак дека се е во ред и дека можам да го оставам да почива во мир“.

Откако добила безброј пораки од луѓе кои оваа приказна ги „допрела до коска“, во уште еден пост објасни дека Џејсон Лигонс, кому му пишувала пораки, не бил нејзиниот биолошки татко, туку човек којшто се грижел за неа од времето кога била дете.

„Тој никогаш не пропушти ниту еден мој настап во училиштето, ниту една моја промоција и, о да, знаеше да ми одржи предавање за моето однесување. Ако добиев дозвола за излегување, морав да го запознаат момчето што ме придружува со него, па исто така ни одржуваше долго предавање“, вели Честити.

Додава дека плачела со него, се делела со него, и станала многу самостојна и самосвесна затоа што тој се потрудил да и покаже како изгледа среќата.

„Џејсон не беше мој вистински татко, но беше татковска фигура за многу деца во нашиот град“, напиша и додаде: „Ја споделив оваа порака заради своите пријатели и семејството, сакам да видат дека Господ постои. Можеби требаа четири години тоа да го сфатам, но се покажа во вистинскиот час“, пренесува „Дејли меил“.

(Фото: Честити Петерсон, Фејсбук)