Албанското министерство за Европа и надворешни работи остро ја осуди „употребата на јазикот на омраза и антиалбанските расистички извикувања“ на вчерашното одбележување на Илинден на Мечкин Камен со надеж дека ваквите недолични однесувања ќе останат само изолиран случај.
„Веруваме дека ова е однесување на една мала група луѓе поттикнати од екстремни националистички чувства и се надеваме дека таквите инциденти кои вклучуваат етничка омраза ќе останат изолирани. Министертвото за Европа и надворешни работи на Албанија ги повикува одговорните институции да спроведат истрага против поттикнувачите на насилство и да ги изведе пред лицето на правдата“, стои во реакцијата на Министертвото.
Во реакцијата уште се додава и дека Албанија и Албанците се и ќе бидат постојано пријатели на Македонија.
„Ние веруваме во вредностите на соживот, во хармонија и соработка меѓу нашите земји и нашите граѓани“, се наведува во писмото на албанското Министертво за Европа и надворешни работи.
