Властите на Соединетите Американски Држави ја превзедоа контролата над зградата на руската трговска мисија во Вашингтон, јави агенцијата ТАС С и додава дека американски стражари се испратени во објектот.
Претседавачот на комитетот за надворешни работи на руската Државна Дума, Леонид Слуцки изјави дека ситуацијата околу трговската мисија на Русија во Вашингтон, во која вчеравечер влегоа претставници на американските власти, укинувајќи го претходно дипломатскиот имунитет на таа зграда, означува најочигледно кршење на Виенската конвенција за дипломатски односи од 1961 година.
„Претресот на зградата на руската трговска мисија во Вашингтон е без преседан и најочигледно кршење на Виенската конвенција. Членот 45 од Конвенцијата вели дека дури и во случај на заострување на дипломатските односи или вооружен напад, државата домаќин мора да ги почитува и штити имотите на странските мисии“, вели Суицки, пренесува ТАС С.
Тој додава дека „без оглед на тоа, САД за за многу кусо време го укинаа дипломатскиот имунитет на руската мисија, обидувајќи се да ја оправдаат сопствената арбитрарност со еднострано толкување на Конвенцијата“.
ТАС С наведува дека високо позициониран руски пратеник нагласил дека протестната нота што ја испратило руското Министерство за надворешни работи е игнорирана и дека рускиот имот дошол под американска контрола.
„Ова се отворени непријателски акти кои во потполност се спротивни на меѓународното право“, навел Слуцки и додал дека Москва го задржува правото на чекори на одмазда темелени на принципот на реципроцитет.
„Јасно е дека САД провоцираат понатамошна ескалација во нашите дипломатски односи“, рекол Слуцки.
Властите на САД ја превзедоа контролата над зградата на руската трговска мисија во Вашингтон, јавува дописникот на ТАС С и додава дека американски стражари се во неа и околу неа.
Шефот на руската трговска мисија во престолнината на САД, Александар Стадник и потврдил на оваа агенција дека, според зборовите на американските власти, на зградата и е укинат дипломатскиот статус.
ТАС С претходно јави дека Американците се подготвуваат да извршат претрес на руската трговска мисија во Вашингтон и дека на советникот во американската амбасада во Москва, Ентони Годфри во врска со тоа му била врачена протестна нота.
„Денес во два часот попладне (по локално време), ќе биде спроведен претресот. Технички претресот ќе го спроведе Стејт департментот“, изјавил портпаролот на руската амбасада Николај Лаконин за ТАС С.
Руското Министерство за надворешни работи соопшти дека планираниот претрес на руски дипломатски објект во САД е невидена работа, агресивна акција која американските разузнувачки служби можат да ја искористат за организирање на провокации со помош на подметнати предмети.
„Во нотата се истакнува дека планираниот нелегитимен претрес на дипломатските простории на Русија без присуство на руски официјални лица и заканата дека предната врата ќе биде обиена ја сметаме за невидено, агресивна акција која американските разузнувачки агенции можат да ја искористат и за организирање на антируски провокации со помош на подметнати компромитирашки предмети“, се нагласува во дописот на Министерството за надворешни работи на Русија.
Патем во него се додава и тоа дека Москва го задржува правото на возвратни мерки врз основа на реципроцитет, пренесува „Спутник“.
„Властите на Соединетите Американски Држави треба да ја запрат најгрубата повреда на меѓународното право и да се откажат од нападот на имунитетот на руските дипломатски институции. Во спротивно, го задржуваме правото да одговориме врз основа на реципроцитет“, се наведува во соопштението.
Претходно од руското Министерство за надворешни работи изјавија дека специјални служби на САД имаат намера на 2 септември да извршат претрес во рускиот конзулат во Сан Франциско, кој исто така е затворен на барање на американските власти, како и во станови на руски дипломатски претставници.
Стејт департментот одби да ги коментира овие информации.
