Во Каиро е одржан вонреден состанок на Арапската лига, на кој министри за надворешни работи од државите членки ја критикувале одлуката на претседателот на САД да го признае Ерусалим за престолнина на Израел, и биле повикани земјите од светот да ја признаат државата Палестина со источен Ерусалим како главен град.
Состанокот траел два и пол часа, а зборувале 20 делегати.
Претседавачот на Арапската лига, Ахмед Абул-Гејт, на почетокот на состанокот во петокот вечерта, повикал земјите од светот да ја признаат државата Палестина, како одговор на одлуката на Трамп. Таа одлука, како што нагласил, ја доведува во прашање улогата на Вашингтон како мировен медијатор, не само на Блискиот исток, туку и во целиот свет, пренесе АП.
„Одлуката станува легализација на окупација“, истакнал Гејт, алудирајќи на израелската окупација, а потоа и на анексијата на источен Ерусалим од 1967 година.
И палестинскиот министер за надворешни работи Ријад ел Малики побарал признавање на Палестина.
Малики ја повикал Лигата да им наложи на своите пратеници во ОН да поднесат нацрт резолуција со која се осудува одлуката на Трамп.
„Ако не сториме ништо по повод ова американско решение, ќе се случат уште многу трагедии. Нема нормализација со Израел и нема компромиси“, порачал ирачкиот министер за надворешни работи Ибрахим ел Џафари.
Министерот за надворешни работи на Либан, Гибран Басил, пак, укажал дека оваа „несреќа би требало да ги соедини и да ги разбуди“.
„Нека се знае дека историјата никогаш нема да ни прости, а нашата иднина нема да биде горда на тоа што го одлучивме“, посочил Басил.
Состанокот на Арапската лигае одржан во време кога продолжуваат протестите трет ден по ред на Западниот брег во појасот газа/
Прашањето за статусот на Ерусалим лежи во суштината на израелско-палестинскиот судир, а потегот на Трамп е широко сватен како здружување со Израел.
Дури и помала криза по прашањето на статусот на Ерусалим и светите места во древниот Стар град во минатото предизвикувала крвопролевање, потсетува АП.
