„Kрушево денес е препознаена туристичка дестинација за љубителите на адреналинот и алтернативниот туризам како од земјава така и од странство, изјави вицепремиерот за економски прашања, Фатмир Битиќи, при посетата на Општина Крушево, каде заедно со градоначалникот, Томе Христоски, го анализираа сработеното од Програмата за поддршка на локалната и регионална конкурентност во туризмот, финансирана од Европската унија и Владата.
„Се радувам кога слушам дека реализираниот проект за реконструкција на спортската сала со околу 45 милиони денари, пари обезбедени од ЕУ и македонската влада, ги привлекува националните тимови и клубовите на висински подготовки овде во Крушево, но и другите туристи, вљубеници во болдеринг и клајмбинг. Тука се и обележените велосипедски патеки со вкупна должина од 40 км и поставените сувенирници на Гумење“, рече Битиќи откако со Христоски извршија обиколка на направените работи.
Преку проектот се изврши и опремување и обучување на 13 члена од спасувачката служба, дел од потпроектот „Кругот на адреналинот – развој на авантуристички туризам во Крушево“.
„Со ова се креирани нови содржини, атрактивни за туристите кои доаѓаат во Крушево, не само од земјава туку и од регионот и пошироко, што успешно влијае за пораст на туризмот, што пак резултира со зголемување на туристичката понуда и отварање на нови работни места. Ние немаме море за масивен туризам, но имаме прекрасни можности за развивање на алтернативниот туризам, за што љубителите на адреналинот веќе го препознаваат Крушево како една таква дестинација со погодна клима и атрактивни предели“, дополни Битиќи.
Според него, Владата секогаш ќе поддржува вакви иницијативи, кои нашиот туристички потенцијал ќе го направи меѓународно конкурентен за привлекување на што поголем број туристи и промовирање на земјата како атрактивна туристичка дестинација.
„Бенефитите за македонската економија од инвестициите направени во рамки на Проектот за локална и регионална конкурентност се повеќекратни. Зголемување на бројот на туристите, локални, и туристи од целиот свет, ова пак резултира со потреба за нови работни места, нови можности за развој и поголеми приходи за нашата економија“, истакна Битиќи.
Градоначалникот Христоски изјави дека Крушево ја има една од 14-те најуспешни приказни во рамките на проектот за поддршка на локалната и регионална конкурентност во туризмот, преку која градот успешно се промовира.
„Проектот ги исполни своите цели. Крушево стана атрактивна, примамлива туристичка дестинација која од ден на ден расте. Има подобрени содржини во неа, маркетинг капацитети и секако и безбедносни. Како резултат на проектот Крушево се здоби со подобрени алатки за придобивање на туристи на меѓународно и национално ниво, како и задоволување на потребите за висок адреналин кои ги бараат гостите. Придобивките се големи, Крушево стана целогодишна, безбедна и атрактивна дестинација за туристи од целиот свет“, подвлече Христоски.
