Третиот рекет на Велика Британија, Даниел Еванс, падна на допинг тест затоа што користел кокаин. Тој на 24 април на турнирот во Барселона бил подложен на тест. Примерокот го обработила ВАДА (Светската антидопинг агенција) во Монтреал и пронајден е кокаин во метаболизмот. Во склад со правилникот нему воведена му е суспензија која ќе трае од 26 јуни до крајот на истрагата.
„Важно ми е да знаете дека супстанцијата ја зедов надвор од теренот и дека тоа нема никакви врски со тенисот. Направив голема грешка и можам само да се извинам од длабочината на моето срце“, изјави Еванс по обелоденувањето на првичните резултати.
Тој е моментно 50 играч на светот, а беше дел од Дејвис куп екипата која во 2015 година го освои пехарот.
Ова не е првпат Еванс да направи „нешто“. Листата е подолга. Во 2006 година се повлече од Вимблдон затоа што, како што изјави, „се однесувал како идиот на теренот“. Две години подоцна пред натпреварот на јуниорските парови на Вимблдон бил фатен во ноќен клуб со парнерот Даниел Сметхурст. Потоа во 2010 година тенискиот сојуз на Велика Британија му го запрел финансирањето поради „лошо однесување и недостаток на приврзаност“.
Ни тука не беше крајот. Три години потоа, во 2013 година на прес-конференција изјави: „Не тренирам доволно, не работев доволно секој ден, и очигледно дека не сум многу добар во својата работа“.
Во 2014 година тренерот Џулијен Хоферлин даде интересна изјава за него: „Може да дојде меѓу најдобрите 60, ако сака, ако се жртвува. Не разбира дека треба тенисот да му биде приоритет. Тој тенисот го сфаќа само како некој краток период во животот“.
После сите овие случувања Еванс реши да се истетовира и на раката да напише: „Секој светец има минато, секој грешник има иднина“.
Сега, со оглед дека беше позитивен на кокаин и дека тоа отворено го призна, најверојатно го очекува повеќегодишна суспензија. Прашање е дали воопшто може да се врати на тенисот.
