Јужна Италија се подготвува за уште два дена разорни дождови и поплави додека ураган, специфичен за Медитеранот, таканаречен медикен, ја разорува областа.
Во бурата досега настрадаа две лица, а сицилијанскиот челник Нело Месумеци ја потврди иформацијата и напомена дека утринава исчезнало уште едно лице.
Маж на педесет и тригодишна возраст загина кога неговото возило се нашло во водите во Катанија, на источниот брег на Сицилија, објави агенцијата АНСА.
Полицијата верува дека излегол од автомобилот и се обидел да избега пред водата што надоаѓала, но не успеал. Неговото безживотно тело е пронајдено во близина, се наведува во текстот.
Во слична трагедија во неделата 67-годишен маж загина во Катанија откако автомобилот му заглавил во водата и калта. По неговата сопруга сеуште се трага, информираа службите за итна медицинска помош.
Градоначалникот на Катанија, Салво Поглиесе, ги повика жителите да останат дома ако е тоа можно.
„Имавме два многу тешки денови и преживеавме драматични часови“, напиша Поглиесе на својот профил на Фејсбук.
Вели дека временските услови се подобруваат, но и предупреди на лошата прогноза за утре и во петок и дека состојбата е прилично загрижувачка.
Издадено е црвено предупредување на Сицилија и регионот во кој се наоѓа градот Катанија, кој веќе беше погоден од невреме цела недела.
Медикен, сличен на ураган кој се створи над Средоземното море, предизвика количина на врнежи на дожд, која во регионот Лингоаглоса паѓа за една година, сега да наврнат за само два дена.
Предвидувањата се дека невремето во ова подрачје ќе потрае до сабота и дека се очекува уште дожд.
На училиштата, продавниците и канцелариите во Катанија, кои не се многу важни, наредено им е да останат затворени до петок. Вчера во градот биле спроведени повеќе од 600 спасувачки операции, објави Министерстерството за внатрешни работи во соопштението за јавност.
Ваквите случувања се појавуваат отприлика два пати годишно, обично меѓу септември и декември.
Да потсетиме, оваа бура се случува додека глобалните челници се подготвуваат за самитот Г-20 во Рим, а климатските промени ќе бидат на дневен ред на тој собир. Веднаш после состанокот на Г-20 почнува ЦОП-26 во Шкотска.
Не се очекува дека временските прилики ќе ги загрозат преговорите на Г-20 во италијанската престолнина.
Науката покажува дека климатските промени предизвикани од човекот прават екстремни временски случувања, вклучувајќи обилни врнежи, почести и поинтензивни.
Климатската криза исто така придонесува за промени меѓу суши и поплави на многу места, вклучувајќи делови на Америка, како и на Блискиот исток и во Африка.
Како што Земјината атмосфера станува потопла, таа може да задржи повеќе влага, заради што во светот има силни дождови.
Сепак, климатската криза исто така прави подолги сушни периоди и суша која ја остава земјата толку сува што не може да го апсорбира дождот толку ефикасно како и обично. Оваа комбинација ги прави поплавите поверојатни, а често и деструктивни.