Од најголемата опозициска партија ВМРО-ДПМНЕ бараат Владата со средства од Буџетот да обезбеди три дополнителни статични и четири мобилни станици за мерење на загадувањето на воздухот.
Оттаму обвинуваат дека градоначалникот на Скопје Шилегов и Министерот за животна средина Макрадули, наместо итно да преземат мерки, ги омаловажуваат и замолкнуваат невладините активисти и граѓаните.
„Република Македонија и Скопје секојдневно се на врвот во друштво на најзагадените држави и градови во Светот, а власта нема спроведено ништо за да го намали загадувањето и да ги спречи последиците по здравјето на граѓаните поради загадениот воздух, се вели во соопштението, во кое потсетуваат дека СДСМ, додека беа опозиција ветуваа итни мерки за почист воздух и дека веднаш кога ќе дојдат на власт ќе го решат проблемот со загадувањето, но веќе речиси две години немаат реализирано ниту еден проект за подобрување на воздухот.
Од СДСМ одговараат дека институциите продолжуваат да го решаваат проблемот со загадениот воздух и дека првите подобрувања се видливи и охрабрувачки.
-Како што јавно обелодени Министерството за животна средина и просторно планирање, во 2018 година постои намалување на бројот на деновите со надмината дозволена загаденост од 50 микрограми, споредено со 2016 и 2017 година, се вели во соопштението.
Според просекот од сите мерни станици во Македонија, во периодот од први јануари до 30 ноември 2018 година, регистрирани се 88 загадени денови, што е благо намалување во однос на 2016 и 2017 кога бројот на загадени денови бил 99.
Поединечно по мерни станици, значителен напредок има во Тетово, каде што во 2016 година имало 273 загадени денови, во 2017 115, а во оваа 2018 година бројот на загадени денови изнесува 105 денови.
Во Битола, на првата мерна станица, минатата година имало 105 загадени денови, а годинава 65.
Намалување на деновите на загадување има и во другите населени места, како Карпош, Центар и др.
Ова се охрабрувачки резултати што мотивираат, се вели во соопштението и се додава дека постојано се преземаат мерки за справување со загадениот воздух за две години да биде намалено за 50 отсто во Скопје и од 30 до 50 отсто во цела Македонија.
