На Волстрит денеска цените на акциите паднаа четврти ден по ред, бидејќи инвеститорите стравуваат дека натамошното зголемување на каматните стапки од страна на американската централна банка ќе предизвика рецесија.
Дау Џонс ослабе 0,49 отсто, и сега е на 32.757 поени, додека СиП500 се „лизна“ за 0,90 отсто, и чини 3.817 поени, а индексот Насдак загуби 1,49 отсто, па сега е на 10.546 поени.
Пазарот е под притисок од минатата среда, кога ФЕД соопшти дека каматите би можеле да се зголемат на повисоко ниво од очекуваното и да останат така подолго од очекуваното.
Според тие проценки, крајната каматна стапка, на која ќе запре циклусот на зголемувања на каматите, би можела да достигне 5,1 отсто, додека претходно се очекуваше 4,6 отсто.
Тоа значи дека ФЕД и во следната година ќе ги зголеми каматите, вкупно за 0,75 процентни поени, во опсег од 5 до 5,25 отсто.
После зголемувањето за 0,50 процентни поени минатата среда, клучните камати се движат во опсег од 4,25 до 4,50 отсто, што е нивно највисоко ниво во последните 15 години.
Последните месеци инфлациските притисоци донекаде се намалија, но минатата недела претседателот на ФЕД, Џером Пауел, порача дека податоците за инфлацијата во октомври и ноември се добредојдени индикации за забавување на темпото за раст на цените, но дека тоа не е доволно.
А, поради зголемувањето на каматите забавува растот на економијата.ФЕД проценува дека бруто домашниот производ (БДП) следната година ќе порасне за 0,5 отсто, како и оваа година, но шефовите на неколку големи американски банки деновиве изјавија дека економијата следната година би можела да западне во рецесија.
„Се поставува прашањето дали економијата лесно ќе се приземји или ќе се нурне во рецесија? Дали ФЕД реагираше соодветно?“, вели Мелиса Браун, директорка во „Аплаид Ресрч“.
Во овој период од годината, обично, цените на акциите растат, бидејќи инвестициските фондови и другите големи инвеститори ги дотеруваат своите портфолија, што е вообичаено за крајот на годината.
Но, аналитичарите велат дека оваа година вообичаениот раст на цените може да отсуствува или ќе биде многу слаб.
„Подемот на Дедо Мраз обично започнува во средината на декември на крилјата на радоста и новогодишниот оптимизам, инвестициските бонуси, нискиот обем на тргување и отсуството на повлекување на капиталот од пазарот. Меѓутоа, во годините кога пазарот е во минус до средината на декември, како што е случајот сега, подемот на Дедо Мраз обично е послаб или помалку сигурен“, објаснува Шејн Оливер, стратег во „АМП Капитал“.
А, на европските берзи цените на акциите вчера пораснаа.
Лондонски ФТСЕ индекс зајакна за 0,40 отсто, и сега чини 7.361 поен, додека франкфуртскиот ДАХ порасна за 0,36 отсто, на 13.942 поени, а париски ЦАЦ – 0,32 отсто, на 6.473 поени.
(Фото: АБЦ Њус)
