Mеѓународно барано лице кое се сомничи за повеќемилионски измами, државјанин на Република Полска, Р.К.З., е уапсено во Подгорица, соопшти Управата на полицијата на Црна Гора.
После повеќемесечни активности за пребарување, службеници од Секторот за борба против криминалот, односно тимот ФАСТ за целни меѓународни потерници на Интерпол, го лишиле од слобода Р.К.З., едно од најбараните лица за кои е распишана меѓународна потерница од Полска и Јужна Кореја, се наведува во соопштението.
Р.К.З. е осомничен за кривични дела од областа на економскиот криминал, и тоа тежок облик на измама во поголем обем, за перење пари, кражба и кршење на законите, за кои во Јужна Кореја е пропишана казна – доживотен затвор.
Станува збор, како што се наведува, за еден од основачите и сопствениците на фондот „Фјучр нет“, во чија дејност е трговија со дигитални и криптовалути, а осомничен е дека со својот партнер, С.М., оштетил поголем број лица во Полска и Јужна Кореја, причинувајќи штета од вкупен износ од околу 21 милион американски долари.
Неговиот партнер С.М. е лишен од слобода во Грција, а потоа во Албанија, додека Р.К.З. во 2022 година, беше уапсен во Италија, од каде што избега од домашен притвор.
Со континуирана работа на утврдување на точната локација на лицето на црногорското крајбрежје, но и во Подгорица, службениците на НЦБ Интерпол – Подгорица во саботата го лоцирале и го лишиле од слобода во Мастер квартот, каде се криел под лажен идентитет.
Откако по комуникација со странските партнери беше потврден неговиот идентитет, извршен е претрес на локацијата каде што престојувал, а техничките уреди и предмети за кои постои сомнение дека произлегуваат од кривично дело, времено се одземени до завршување на постапката за екстрадиција.
Р.К.З. ќе биде изведен пред истражен судија во Вишиот суд во Подгорица заради одредување екстрадиционен притвор.
