Тајван објави дека утрово во близина на островот открил три воени бродови и кинески противподморнички хеликоптер, после состанокот во Калифорнија меѓу својата претседателка Тсаи Инг-вен и претседателот на Претставничкиот дом на САД, Кевин Мекарти, за кој Пекинг вети „одлучен“ одговор.
„Еден авион и три брода на Народноослободителната војска беа откриени во 06 часот по локално време (22 часот, вчера, по ГМТ), рече во изјава тајванскиот министер за одбрана.
„Вооружените сили ја следеа ситуацијата и им дадоа задача на борбени воздушни патролни авиони, поморски бродови и на копнените ракетни системи да одговорат на овие активности“, истакна тој.
Пекинг вчера вети „одлучни и ефикасни мерки за заштита на националниот суверенитет и територијалниот интегритет“.
Кинеското Министерство за надворешни работи го споредува состанокот меѓу Тсаи и МекКарти на американско тло со „сериозно погрешни дела на таен договор“ меѓу САД и Тајван, се вели во соопштението за печатот.
Оваа објава доаѓа во време кога францускиот претседател Емануел Макрон е во државна посета на Пекинг, каде денеска треба да се сретне со својот кинески колега Си Јин-пинг.
Советот за копнени прашања во Тајпеј (MAC), највисокото тело на самоуправниот остров одговорно за одредување на политиката кон Кина, вчера го обвини Пекинг дека ја „нарушува“ трговијата во Тајванскиот теснец, спроведувајќи инспекции на товарни и патнички бродови.
Кинеските поморски власти претходно рекоа дека ќе ги засилат патролите во водите меѓу островите и континентална Кина, без да дадат дополнителни детали.
Кина смета дека демократскиот и автономен остров Тајван е една од нејзините покраини што треба да се врати, залагајќи се за „мирно обединување“, но не исклучувајќи ја употребата на сила.
(Фото: Ројтерс / Ен Ванг)
