Израелската војска тврди дека разнела „подземен терористички град“, сместен под централниот плоштад во Газа, кој бил користен за планирање на масакрот на 7 октомври.
Израелските одбранбени сили (ИДФ) соопштија дека откриле „терористичка инфраструктура“ под Плоштадот Палестина во центарот на градот со долги тунели, скривници и канцеларии на високи воени и политички лидери на Хамас.
Снимки направени од воздух кои ги објави ИДФ вчера доцна во ноќта покажуваат серија експлозии кои ја уништуваат подземната инфраструктура.
Израел во декември извести дека обезбедил контрола врз „елитниот кварт на Хамас“ во градот Газа од каде што дејствувале лидерите на Хамас.
Комплексот го опишаа како „средиште на моќта на военото и политичкото крило на Хамас“.
Тврдат дека 600 членови на Хамас се убиени во операцијата во квартот Римал.
„Плоштадот Палестина беше центар на военото владеење на Хамас и е опкружен со згради кои служеа како командни и контролни центри, со окна од терористички тунели и со стратешки згради кои и припаѓаат на организацијата“, се вели во соопштението на ИДФ.
Истакнуваат дека инфраструктурата на Хамас е вградена во прометната населба полна со продавници, станбени згради и училиште за глуви деца.
Мрежата активно ја користеле лидерите на Хамас, Јахја Синвар, Мохамед Деиф и други, а служела и за организирање и координација на крвавите напади на 7 октомври, тврдат од ИДФ.
И покрај неуспехот за договор со Хамас за ослободување на преостанатите заложници, се верува дека Израел ги продолжува своите напори за спасување на уште 129 израелски заложници што се држат во Појасот Газа.
Израел се уште не сака да понуди трајно примирје што го бара Хамас, но изрази подготвеност да понуди двонеделно примирје.
Во меѓувреме продолжија жестоките борби на територијата на Појасот Газа.
Најмалку 16 лица од поширокото семејство на министерот за здравство на Газа се убиени во воздушен напад врз неговиот дом во северниот град Џабалија, според палестинската новинска агенција Шехаб.
Министерот Мунир Ал Бурш е тешко повреден во нападот на куќата на неговата сестра. Исто така, на северната граница на Израел, по 17-часовна пауза, продолжи размената на прекугранични оган со Хезболах. Мноштво ракети беа истрелани од јужен Либан, каде што дејствува милитантна организација поддржана од Иран.
(Фото: Аа/Абака – Прес/Профимедиа)
