„Српската полиција уапси 13 членови на организирана криминална група составена од повеќе помали подгрупи кои дејствувале како „Балкански картел“, а се сомничат за шверц на најмалку седум тони кокаин“, изјави во средата началникот на Управата за криминалистичка полиција, Нинослав Цмолиќ.
Тој на вонредна конференција за медиумите рече дека се уапсени организаторите на таа група, М.С. и М.Р., а дека групата се доведува во врска со криумчарење на најмалку седум тони кокаин од повеќе земји од Латинска Америка и Африка.
„Во соработка со Европол, Србија успеа да ги идентификува „клучните цели на нејзината територија“ и да ги мапира нивните криминални активности низ светот“, рече Чмолиќ.
На новинарите им беше речено дека се верува оти овој картел стои зад пратките од повеќе тони кокаин кои во Европа пристигнале од Колумбија, Бразил, Еквадор, но и преку Западна Африка „како логистичка транзитна поддршка“.
Клучот за разоткривање на групата, како што објасни Цмолиќ, било декодирањето на телефонската „Скај“ (Sky) апликација, а членовите на групата биле уапсени во Белград, Суботица и Зрењанин.
Овој картел, кој, според неговите зборови, „денес практично е уништен“, функционирал самостојно.
„Тоа е најголемиот нарко картел на Балканот“, оцени високиот функционер на српското Министерство за внатрешни работи.
Тој наведе дека целата запленета дрога била надвор од територијата на Србија, во други европски држави, бидејќи „Србија не била интересна за толкави количества кокаин“.
Не сакаше да ги именува водачите на криминална група, правдајќи се со фактот дека тоа е во надлежност на Обвинителството за организиран криминал.
