Граѓани и еко-активисти вечерва излегоа на протест да го искажат своето незадоволство од Власта за непреземање мерки за решавање на проблемот со загадениот воздух.
До градоначалникот Коце Трајановски од протестниот собир беа испорачани барања со кои треба се намали големата концетрација на ПМ 10 и ПМ 2.5 честички во воздухот.
Демонстрантите носеа транспаренти на кои пишуваше „Воздух за сите“ и „Кога ќе пораснам сакам да дишам“ и извикуваа „Спасете ги децата“.
До новата власт и локалните самоуправи граѓаните доставија барања за, како што истакнаа, решавање на енормниот проблем со аеро загадувањето.
Пред насобраните говореа активистите Горјан Јовановски, Лазар Ѓуров и Јован Мазгански.
„Проблемот не може да се реши за 24 часа, свесни сме, но можеме да го намалиме. Треба да се обидемет, дали со воведување на системот пар-непар или бесплатни автобуси“, истакна Мазгански.
Лазар Ѓуров, пак, рече дека лицата кои освоиле некакви позиции воопшто не се грижат за децата.
„Градоначалниците сега седнаа да муабетат дека има проблем со воздухот, а воздухот е загаден со години и секоја година е повеќе и повеќе. Зошто се праите луди, запраша Ѓуров.
Организаторите тврдат дека ниту една политичка партија не стои позади овој протест и дека собирот е без политичка позадина. Тие доставија барање за средба до Премиерот на Македонија за да разговараат на оваа тема како и да му се достави граѓанската листа на мерки за решавање на проблемот.
Граѓаните од Собранието и новата Влада, меѓу другото, бараат воведување на пар-непар за моторните возила, забрана за движење на возила кои се без катализатори за издувни гасови, бесплатен градски превоз во зима, итна набавка и бесплатна поделба на маски со потребни стандарди за заштита за целото население на Скопје, излегување на терен на зголемен број на инспекциски тела за контола на начинот на греење на граѓаните, обезбедување на бесплатен огрев за граѓаните кои се грејат на гуми и други штетни материи и ненајавени контроли на оџаците на индустриските капацитети за кои постои сомневање дека загадуваат.
