Министер од Пакистан е обвинет дека имал приватен затвор во неговата куќа, откако три тела се пронајдени во бунар во близина на неговиот дом.
Сардар Абдул Рехман Кетран, министер за комуникации и труд на покраината Белучистан, ги отфрли обвинувањата и рече дека сето ова е дел од заговор против него.
На 20 февруари полицијата пронашла распарчени тела на жена и двајца помлади мажи во вреќи фрлени во бунар во близина на куќата на министерот, јавуваат локалните медиуми.
Жртвите се идентификувани како Гиран Наз (40) и нејзините синови Мохамед Наваз (22) и Абдул Кадир (15).
Стотици луѓе протестираа против министерот во средата, пишува „Индипендент“.
Според медиуми, жртвите биле идентификувани како сопруга и синови на Кан Мухамед Мари, кој тврди дека министерот го држел неговото семејство во заробеништво, во приватен затвор, речиси четири години.
„Ова се телата на мојата сопруга и синовите кои се чуваа во приватна ќелија во последните четири години“, рече тој.
Тврди дека неговите пет други деца, меѓу кои и неговата 13-годишна ќерка, сè уште гнијат во приватниот затвор на министерот.
Министерот за внатрешни работи нареди „безбедно враќање“ на киднапираното семејство.
По овие обвинувања, локалната полиција упадна во куќата на министерот, но до сега никој не е уапсен.
Случајот предизвика бес на социјалните мрежи, а во осудата се приклучи и поранешниот пакистански премиер Имран Кан.
„Најостро го осудувам незаконското затворање, физичкото малтретирање и убиството на сиромашна жена и нејзините деца во приватниот затвор на Сардар Абдул Рехман Кетран“, напиша тој на Твитер.
Порача дека веднаш треба да се преземат дејствија против „законот на џунглата“.
Мари вели дека неговото семејство било грабнато и затворено во 2019 година, откако тој не сведочел во случај меѓу провинцискиот министер и неговиот син Сардар Инам Кетран. Демонстрантите рекоа дека нема да ги закопаат телата на жената и нејзините синови додека не од нив не се прости премиерот Шехбаз Шариф.
Локалната болница соопшти дека на телата имало знаци на тортура и рани од куршуми во главите. Рацете и стапалата им биле врзани со јажиња, додека лицето на жената било смачкано.
Министерот ги отфрли обвинувањата дека држел приватен затвор и го мачел семејството.
Сепак, неговиот син Инам Шах, наводно, потврдил дека телата се пронајдени во бунарот.
Ова не е првпат министерот да биде обвинет за водење приватен затвор. Локалната полиција и антитерористичките сили во 2014 извршија рација на неговиот имот и тогаш соопштија дека биле пронајдени седум лица, меѓу кои две жени и три деца.
