Со увоз на евтина руска нафта, Индија заштеди приближно 2,7 милијарди долари во првите девет месеци од оваа година, пресмета „Ројтерс“ врз основа на владините податоци. Индија е трет најголем увозник и потрошувач на нафта во светот, со околу една третина од вкупната вредност на нејзиниот увоз.
Годинава ја замени Европа како најголем купувач на руска сурова нафта испорачана по море, откако Западот воведе санкции кон Русија по влегувањето на руските трупи во Украина.
Пристапот до евтина руска нафта и овозможи на Индија да го намали увозот од Блискиот Исток, каде што цените се зголемија откако Саудиска Арабија го намали снабдувањето, заедно со другите членки на Организацијата на земјите извознички на нафта (ОПЕК) и нивните сојузници, за да го стабилизира пазарот.
Во деветте месеци, заклучно со септември, Индија увезла 69,06 милиони метрички тони руска нафта, што е еквивалентно на 1,85 милиони барели дневно, вклучувајќи ја и руската нафта увезена преку Јужна Кореја, Грција и Шпанија, покажаа податоците на Министерството за трговија.
Во тој период, просечната цена на руската нафта испорачана до индиските рафинерии беше 525,60 долари за тон, вклучувајќи ги и трошоците за испорака и осигурување, покажаа пресметките на „Ројтерс“ направени врз основа на податоците на министерството.
Просечната цена на ирачката нафта, која по квалитет е слична на таа на руската Уралс, во истиот период изнесуваше 564,46 долари за тон.
Тоа значи дека Индија со купувањето на руска нафта заштедила 2,7 милијарди долари, покажаа пресметките.
Така Русија стана нејзин најголем снабдувач на нафта, истиснувајќи го Ирак на второто место. Саудиска Арабија, пак, падна на третото место.
Кина, најголемиот увозник на нафта во светот, според „Ројтерс“, заштедила речиси 10 милијарди долари благодарение на рекордните набавки на нафта од земјите што се под западни санкции, вклучувајќи ја и Русија.
Индија, потсетува новинската агенција, за разлика од Кина, не купува венецуелска и иранска нафта.
Со увоз на руска нафта индиските рафинерии ги намалуваат трошоците за суровините, што ги зголеми бруто-маржите за преработка и ја ублажи загубата на приходи поради субвенционираните цени на горивата во малопродажбата.
Државните рафинерии не ги менуваа цените на пумпите повеќе од една година, помагајќи ѝ на владата во нејзините напори да ја запре високата инфлација.
Побарувачката за деривати во Индија годинава порасна за околу 14 отсто.
