Задржувањето на основачот на Викиликс, Џулијан Асанж, во затвор повеќе „не служи за ништо, за никаква цел“, изјави денеска австралискиот премиер Ентони Албанесе.
Асанж, австралиски државјанин, се наоѓа во лондонскиот затвор Белмарш, откако пред четири години беше извлечен од амбасадата на Еквадор.
Педесет и едногодишниот Австралиец води долготрајна правна битка за да избегне екстрадиција во Соединетите Американски Држави.
САД го обвинија Асанж за заговор со поранешната американска воено-разузнавачка аналитичарка, Челзи Менинг, и одавање огромна количина доверливи материјали во 2010 година.
Албанесе го нарече „фрустрирачко“ продолжувањето на престојот на Асанж во затвор.
„Мислам дека случајот со Асанж треба да се разгледа во смисла на она што се случило, кои се обвиненијата и дали времето што веќе е отслужено го надминува она што би било разумно доколку обвиненијата се докажат“, изјави тој за австралиската телевизија AБЦ.
„Но, кога Австралијците ќе ги разгледаат околностите, и ќе го видат фактот дека личноста која ја објави информацијата (Челзи Менинг) сега е на слобода и слободно се шета откако беше во затвор некое време… тогаш сфаќаат дека има нееднаквост“.
Албанесе рече дека е „доволно“, иако има „проблеми“ со она што го направил Асанж.
