Сѐ повеќе туристи од Балканот летово ќе патуваат кон Грција со сопствен автомобил, но механичарите и туристичките експерти предупредуваат дека еден ненадеен дефект може да го претвори одморот во сериозен финансиски трошок. Според информации објавени од туристички и сервисни експерти, одредени поправки во Грција можат да чинат и над 1.000 евра, особено ако станува збор за посериозен дефект на моторот или електрониката.
Најчести проблеми со кои се соочуваат туристите се прегревање на моторот, дефекти на системот за ладење, проблеми со акумулаторот, гумите и сопирачките. За обична дијагностика и помала интервенција кај прегреан мотор цените најчесто се движат од 50 до 150 евра, додека посериозните оштетувања можат значително да ја надминат оваа сума. Замена на сопирачки или основна поправка на системот за кочење може да чини најмалку 150 евра, а кај покомплексни дефекти сумата дополнително расте.
Дополнителен трошок претставува и излегувањето на механичар на терен, услуга што во Грција најчесто се наплатува посебно. Доколку возилото остане во дефект на автопат или во туристичко место, покрај поправката може да се наплати и шлеп-служба, што дополнително ги зголемува трошоците.
Експертите затоа препорачуваат пред тргнување на патување задолжително да се проверат течностите во возилото, состојбата на гумите, сопирачките, акумулаторот и системот за ладење. Особено внимание треба да се посвети на автомобилите што ќе поминуваат стотици километри во летни услови и високи температури.
Туристичките организации советуваат возачите да имаат и валидна патна помош или осигурување што покрива дефекти во странство, бидејќи во случај на посериозен проблем тоа може да заштеди стотици евра. Во екот на сезоната, кога патиштата кон грчките летувалишта се преполни, ваквата заштита станува особено важна.
Иако Грција останува една од најомилените летни дестинации за туристите од регионот, експертите потсетуваат дека добрата подготовка на возилото пред патување е најдобриот начин да се избегнат непланирани трошоци и непријатности за време на одморот.
ФОТО: МИА
