Денеска кинескиот претседател Си Џинпинг (69) обезбеди нов петгодишен мандат, трет едно по друго, едногласно, од речиси три илјади членови на кинескиот парламент, Националниот народен конгрес (НПЦ), што е и преседан бидејќи станува најмоќниот лидер на земјата по Мао Це Тунг.
На изборот немаше друг кандидат, а гласањето траеше околу еден час, додека електронското пребројување заврши за околу 15 минути.
Си во 2018 година ги укина ограничувањата на претседателските мандати, а неговото владеење веќе беше продолжено минатиот октомври, кога повторно беше потврден за уште пет години како генерален секретар на Централниот комитет на владејачката Комунистичка партија.
Во следните два дена, се очекува да бидат именувани или избрани функционери одобрени од Си за пополнување на највисоките владини позиции, вклучувајќи го и Ли Кијанг, кој е на чекање за премиерската функција и за кој се очекува да биде назначен на втората позиција во Кина, за да раководи со втората најголема економија во светот.
Изборот на државните лидери во парламентот се одржува три месеци по укинувањето на строгите политики поврзани со ковид-19 и новиот бран на инфекции предизвикани од високо преносливиот вид на вирусот „омикрон“ што ја зафати земјата, заради што во парламентот сите делегати и персоналот, освен десетина највисоки челници, носеа маски.
Во понеделник, Си ќе одржи говор пред затворањето на годишното заседание на парламентот, додека Кина се соочува со голем број предизвици, вклучувајќи ја и економијата, попречена од тригодишното забавување од Ковидот и влошените односи со Западот.
Претходно оваа недела, Си ги обвини САД и Западот за тешкотиите со кои се соочува кинеската економија.
Покрај претседателска улога, која е главно церемонијална, партијата повторно го избра Си за претседател на Централната воена комисија, со што почна и неговиот трет петгодишен мандат како врховен командант на вооружените сили на Кина.
Парламентот, исто така, ги избра Жиао Леи (66) за нов претседател на парламентот и Хан Женг (68) за нов потпретседател, и двајцата од претходниот тим на партиски лидери на Си во Постојаниот комитет на Политбирото.
(Фото: АФП / Ноел Селис)
