Турскиот претседател Таип Ердоган рано утрово изјави дека неговата владејачка партија не го постигнала посакуваниот резултат на вчера одржаните локални избори, додавајќи дека ќе се самокритикува и ќе се позанимава со недостатоците.
Турците ги казнија Ердоган и партија АКП ширум земјата, рушејќи ги надежите на претседателот дека ќе ги врати општините во Истанбул и Анкара, кои опозицијата ги освои во 2019 година.
Обраќајќи им се на поддржувачите во Анкара, Ердоган рече дека изборите не се крај, туку пресвртница за неговиот сојуз, додавајќи дека изборниот циклус, кој датира од минатиот мај и ја исцрпи турската економија, сега е завршен.
Ердоган, кој е на власт повеќе од две децении, беше ангажиран во кампањата, особено во Истанбул, економскиот и културниот центар на земјата, чиј градоначалник беше во 90-тите години од минатиот век. Но, тоа не и помогна на неговата партија.
Актуелните опозициски градоначалници на Истанбул и Анкара вчера прогласија победа на локалните избори, што значи дека партијата на турскиот претседател загуби во двата најголеми града во земјата.
Градоначалникот на Истанбул, Екрем Имамоглу, кандидат на најголемата турска опозициска партија ЦХП, околу полноќ еуфорично изјави дека останува прв човек на градот, велејќи дека води со повеќе од еден милион гласови по преброените 96 отсто од гласачките ливчиња.
Повторниот избор на Имамоглу за челник на најголемиот град во земјата ќе го вклучи во трката за претседателските избори во 2028 година.
И градоначалникот на Анкара, Мансур Јавас, исто така од партијата ЦХП, прогласи победа.
„Изборите завршија, ние продолжуваме да им служиме на Анкара и нејзините шест милиони жители без дискриминација“, вети тој.
Во останатиот дел од земјата, кандидатите на АКП очекувано водат во трката во неколку големи градови во Анадолија и на Црното Море, кои се упоришта на претседателот Ердоган.
Прокурдската партија ДЕМ најверојатно ќе победи во поголемите градови на југоистокот со мнозинско курдско население, вклучувајќи го и Дијарбекир.
Жестоки нереди на избирачките места, се вадеше оружје, луѓе се тепаа со лопати и камења, тројца загинати!
Локалните избори во Турција беа одбележани со насилство во кое загинаа најмалку три лица, а десетици беа повредени.
Во инцидент на југоистокот на Турција, групи луѓе се судрија со оружје, мотики и камења, а во таа прилика едно лице загина, а 11 се повредени.
Во друг инцидент, во тепачката, убиено е едно лице, а четворица се повредени, пишува Ројтерс.
Критичарите велат дека актуелната влада насилно го замолчува несогласувањето, дека ги крши човековите права и ги контролира судството и другите државни институции, што турските власти го негираат.
(Фото: Франс Прес / Твитер)
