Шведскиот производител на опрема за мобилни мрежи Ериксон би можел да отпушти околу 25.000 работници надвор од Шведска како дел од програмата за штедење, објави денеска шведскиот весник „Свенска Дагбладет“, повикувајќи се на анонимни извори од компанијата.
Од шведската компанија во јули најавија дека ќе ја забрзаат имплементацијата на мерките за штедење, со цел до средината на следната година да се постигне предвидената цел и двојно да се зголеми минатогодишната основна оперативна маржа од шест проценти. Тие додадоа дека во истиот период имаат намера да ги намалат трошоците за најмалку 10 милијарди круни (1,2 милијарди долари) годишно.
Во Ериксон најавија дека заштедите ќе ги спроведат првенствено во секторот за услуги и во ставката – заеднички трошоци, додека Одделот за истражување и развој ќе остане поштеден.
Фирмата се соочува со се пожестока конкуренција, вклучувајќи ги кинески Хуавеј и финската Нокиа, како и со слабеење на побарувачката на пазарите.
„Свенска Дагбладет“ пишува дека не е јасно дали со планираните отпуштањата ќе бидат опфатени работниците од Одделот за работењето со медиумите кои ќе бидат предмет на стратешка ревизија, а аналитичарите проценуваат дека фирмата ќе се „ослободи“ од нив со продавање.
„Ериксон не прецизираше кои точно сектори односно пазари ќе бидат опфатени со отпуштањата. Премногу е рано да се наведуваат конкретните мерки, односно за исклучување на која било земја“, наведува Ериксон во соопштението објавена на веб страницата на компанијата.
Ериксон во моментов вработува 109.000 работници.