Испраќањето на неколку стотици припадници на британскиот Падобрански полк во Босна и Херцеговина и Косово е откажано откако се појавија снимки на кои се гледа дека некои војници се вмешани во сексуални односи, пишува Би-Би-Си.
Новиот командант на британската армија, генерал Сер Патрик Сандерс, рече дека „привремено ја изгубил довербата“ во Третиот баталјон на падобранскиот полк. Видеото од оргијата, наводно, е снимено во касарната Мервил во Колчестер, Есекс.
Сер Патрик напиша дека таквото, сè уште наводно, однесување е „неприфатливо, корумпирано и штетно за угледот на војската“.
Станува збор за различни видео клипови кои кружат наоколу, во кои жена има сексуални односи со војници од 16-та воздушно-јуришна бригада, за што престижниот лондонски „Тајмс“ извести на 7 јуни.
Токму заради тоа сега е стопирано испраќањето на околу 300 припадници на Третиот баталјон, кои на почетокот на септември требаше да бидат распоредени на Балканот.
Ендреј Харисон, полковник на Падобранскиот полк, напиша писмо во кое се вели дека секој припадник на баталјонот „ќе биде скршен од изгубената можност повторно да служи во операциите на Балканот“ бидејќи „привремено е изгубена довербата“ на началникот на Генералштабот, Сер Патрик Сандерс.
„Тие ќе размислат каде е потребно да го приспособат однесувањето и културата што ги поткопува угледот и оперативната ефикасност на исклучителниот баталјон“, рече тој, пренесе Би-Би-Си.
Во писмото до кое дојде Телеграф, Сер Патрик истакна дека наводното однесување на снимката е утврдено дека е договорно и дека Кралската воена полиција утврдила дека не е сторено кривично дело. Меѓутоа, тој додаде дека тоа е „неприфатливо и дека може да се толкува и како понижување на жените“.
„Знам дека баталјонот брзо ќе реагира и ќе го врати угледот што го заслужува“, рече тој.
Сер Патрик во понеделникот ја презеде функцијата од генералот Сер Марк Карлтон Смит, набргу откако министерот на вооружените сили, Џејмс Хепи, рече дека му е жал и дека се чувствува непријатно од „срамното“ видео.
(Фото: Танјуг/АП)