Во прашање се денови да се случи телефонскиот разговор меѓу премиерите на Македонија и на Грција, и во моментот се уште се создаваат околностите за да се реализира тоа. Ова го порача денеска премиерот Зоран Заев на маргините на завршната конференција на проектот Мрежа 23+ поглавје 23: Пандорина кутија или клуч за добор владеење?, одговарајќи на новинарско прашање за тоа до каде е разговорот со Алексис Ципрас, но и коментирајќи ја изјавата на шефот на грчката дипломатија Никос Коѕијас дека е време да се каже едно големо „да“ или „не“ во процесот на преговорите.
Во врска со изјавата на Коѕијас дека во игра се три предлози – Република Северна Македонија, Република Горна Мкаедонија и Република Нова Македонија, Заев одговори дека верува оти процесот е на самиот крај и оти крајот ќе биде среќен и успешен.
„Да не избрзуваме со детали за тоа, се уште се создаваат околностите за да се случи телефонскиот разговор. Денови се во прашање. Откако ќе се случи граѓаните ќе бидат информирани за тоа и за неговата содржина- рече македонскиот премиер.
Тој не сакаше да коментира дали во игра се нови креативни решенија кои вчера во интервју за Канал 5 ги изнесе Артан Груби од ДУИ, Република Крушевска Македонија, Република Современа Македонија и Република Европска Македонија.
„Прашањето е сензитивно и ќе останам внимателен. Овие денови сакам да бидат денови на успешно завршување на процесот. Кога сите детали ќе бидат договорени веднаш ќе бидат споделени.
„Чувствително е кај нас, чувствително е и во Грција“, рече Заев и додаде дека за прашањето на крајот граѓаните ќе одлучуваат на референдум.
