„Фрустрациите околу блокадата на разговорите за членство и испораката на вакцини, им дава шанса на Кина и Русија“, вели премиерот Зоран Заев во интервју за магазинот „Политико“, направено во рамки на неговата минатонеделна посета на Атина, притоа предупредувајќи ја Европската унија дека ќе добие удар врз репутацијата на Балканот и ќе загуби повеќе простор пред ривалските сили доколку не почнат преговорите со Македонија и Албанија.
Заев во интервјуто вели дека неуспехот да се започнат преговорите ќе влијае на само на Македонија и Албанија, туку и на поширокиот регион на Западен Балкан.
Заев смета дека ако ЕУ не ги исполнува своите ветувања во регионот, тоа ќе биде мал поттик за Косово и Србија да најдат решение во разговорите спонзорирани од ЕУ и ќе направи да биде помалку веројатно дека Босна и Херцеговина ќе ги спроведе потребните реформи.
Доколку патот на регионот кон ЕУ забави, тоа според Заев, ќе отвори повеќе простор за другите сили, особено за Русија и Кина.
Македонскиот премиер, исто така, ја отфрла и идејата на еврокомесарот Оливер Вархеји за раздвојување на Албанија и Македонија за почеток на преговорите.
„Има јасна порака против одвојувањето и се надевам дека Бугарија ќе биде разумна“, вели Заев за „Политико“.
Во интервјуто, Заев проблемот го опишува како „несуштински“ и изразува оптимизам дека може да се најде решение за спорот со Бугарија.
Тој се надева на помош од западните сили, вклучително американскиот претседател Џо Бајден.
Доколку нема напредок, предупредува Заев, процесот на проширување ќе биде замрзнат најмалку уште година и половина, поради изборите во Бугарија, Германија и Франција.
„Толку многу жртви, и после тоа ЕУ да не испорача… Тоа е проблем. Покажавме повеќе европски вредности и манири од Унијата“, истакнува Заев.
Во однос на вакцините, вели дека неговата влада платила политичка цена за довербата во солидарноста на ЕУ.
Наспроти сите неуспеси во последниот период, Заев е оптимист дека ЕУ брзо може да ја поврати довербата, со брзо отворање на разговорите за членство.
(Фото: МИА)
