„Уште поенергично ќе ги водиме реформските и политичките процеси во следните два месеца, за во јуни, да добиеме датум за почеток на преговорите со Европската унија“, рече премиерот Зоран Заев на денешната прес конференција по повод врачувањето на препораката за влез во Европската унија од страна на еврокомесарот Јоханес Хан.
Цврсто сме определени, истакна Заев, да спроведеме одржливи решенија за суштинските реформи, и по Планот 3-6-9, врз основа на Извештајот на Европската комисија, ќе утврдиме нов План за реформската динамика до крајот на 2018 година, којшто ќе биде најверојатно поврзан со имплементацијата на она што го усвоивме.
„Извештајот на Европската комисија ги вреднува сите наши досегашни заложби и отпочнати процеси за темелни реформи и инклузивни политики, што се одлика на една демократски ориентирана држава“, рече македонскиот премиер.
Тој потсети дека во изминатите два извештаја на Европската комисија, заради длабоката политичка криза, назадувањето со реформите и констатацијата за „заробена држава“, препораката за почеток на преговорите беше суспендирана и условена со обезбедување демократски амбиент и демократски реформи, согласно очекувањата на граѓаните, согласно договореното во Пржино и согласно препораките на групата на Прибе.
„Мнозинската волја на граѓаните, застанати зад определбата за едно современо општество за сите, ја донесе одлуката за демократска и европска Република Македонија и за промена на стагнацијата со проактивни политики кон реформи и пријателства што придвижуваат напред. Сите знаеме и зошто – затоа што членството во ЕУ и во НАТО значи и подобра бизнис клима, и повеќе инвестиции, и повисоки плати, и подобар живот“, изјави премиерот Заев.
