Претседателот на Владата на Република Македонија, Зоран Заев придружуван од неговите советници за економија и финансии денеска се сретна со Анка Јоана Јоанеску, директорка на канцеларијата на Европската Банка за обнова и развој (ЕБОР) за Македонија и Косово и Френклин Стивс, виш советник во рамки на Иницијативата за инвестициска клима и добро управување (ICGI) што ја спроведува Европската банка за обнова и развој.
На средбата се разменија мислења за новите позитивни трендови по кои економијата во Република Македонија се стабилизира, за идните очекувања на економски план како и за области на соработка во кои Европската банка за обнова и развој може да придонесе со своја помош и поддршка преку проектите што ги спроведува во земјите од Западен Балкан.
Претставниците на Европската банка за обнова и развој ги презентираа можностите за соработка со Владата на Република Македонија во рамки на Иницијативата за инвестициска клима и добро управување којашто се однесува на неколку важни аспекти како што се промоција на дијалог помеѓу јавниот и приватниот сектор, проекти за зголемување на конкурентноста, проекти кои се однесуваат на инспекцискиот надзор и контрола.
„Во однос на реформската агенда што Владата на Република Македонија ја спроведува претставниците на ЕБОР изразија силна поддршка за реализација на реформските процеси. На состанокот се разговараше и за реформата во јавната администрација, за зајакнување на капацитетите на општините, за степенот на реализација на капитални инвестиции и нивното значење за забрзување на економскиот раст како и за мерките на поддршка од Планот за економски раст за кои се очекува да донесат нови инвестиции и раст на продуктивноста и конкурентноста.
„Реформската агенда и поголема реализација на капитални инвестиции се врвни приоритети на Владата на Република Македонија за оваа 2018 година. Ќе ги разгледаме сите можни аспекти и ќе ја интензивираме соработката со ЕБОР во насока на реализација на овие цели“ рече премиерот Заев на средбата со претставниците на ЕБОР.
