Земјотресот со магнитуда од 5,3 степени што вчера вечерта во 22:43 часот беше
почувствуван во земјава, ги вознемири жителите на Битола, Охрид и Кичево кои во
голем број ги напуштија своите домови. Граѓани од трите града велат дека потресот
предивикал напукнување на ѕидовите во некои објекти, но информации за
посериозни штети засега нема.
Тресењето на станбените објекти проследено со силен звук ги принуди жителите да ги напуштат домовите. По првиот најсилен земјотрес, до полноќ почувствувани се уште неколку послаби.Четириесет и пет минути по првиот потрес интернетот и мобилните телефони во Битолско не функционираа и беа во прекин.
Според Геодинамичкиот инсититут на Националната опсерваторија во Атина, епицентарот на земјотресот бил на грчко-македонската граница, шест километри северозападно од градот Лерин.
За нешто помалку од 40 минути по силниот земјотрес, во поширокиот регион на Лерин биле регистрирани уште седум помали земјотреси, од кои еден од 4,2 степени, еден од 3,9 и два од 3,5 степени, според податоците од Геодинамичкиот институт на Националната опсерваторија во Атина.