Израелската армија за краток рок успеа да мобилизира околу 360.000 резервисти. Ова е најголемата мобилизација во Израел од војната во 1973 година, кога беа мобилизирани 400.000 резервисти, по ненадејниот арапски напад кој го предводеа Египет и Сирија.
„За 48 часа мобилизиравме 300.000 резервисти“, се пофали во понеделникот портпаролот на израелската армија.
„Ова ги прави израелските одбранбени сили (ИД) неспоредливи со остатокот од светот“, коментира воениот аналитичар Франц-Штефан Гади.
Повикани се околу четири отсто од населението во земјата од 9,8 милиони, од кои многумина поради повикот за војна се вратија од странство, пишува „Вашингтон пост“.
Некои доброволно се пријавиле, иако одамна ја поминале старосната граница за мобилизација, се наведува во текстот на угледниот американски весник.
Нападот на Хамас во саботата ноќта ги избриша политичките разлики во Израел.
Педесет и шестгодишниот приватен стопанственик Ноам Ланир, од Тел Авив, е еден од водачите на групата резервисти „Браќа и сестри по оружје“, која протестираше против планот на владата на Бенјамин Нетанјаху да ги ограничи овластувањата на Врховниот суд. Тој го дал својот приватен авион да ги превезе Израелците кои сакаат да се вратат дома од Италија и Грција.
„Го преживеавме Аушвиц, а ја преживеавме војната во Јом Кипур. Ќе го преживееме и ова“, изјавил Ланир за „Вашингтон пост“.
Израелците служат задолжителен воен рок од 18-годишна возраст, после што се распоредуваат во резерва, до 40-та година од животот.
Многу Израелци побрзаа да се вратат дома од странство, а бројни авиокомпании ги откажуваат летовите, па цените на билетите вртоглаво пораснаа.
На аеродромот во Берлин неколку десетици Израелци чекале со надеж дека ќе се качат во авионот за Тел Авив.
Прво војската, им рекле, најавувајќи им дека на летот можат да земат само десет луѓе без билет.
Израелската национален авиопревозник „Ел Ал“ најави дека планира дополнителни летови.
Во европските земји беа испратени и два транспортни авиони „Херкулес“, соопшти војската. „Летовите се полни“, им рекле на новинарите на „Вашингтон пост“ израелските резервисти кои се враќаат дома од аеродромот во Мајами, од каде има директен лет на „Ел Ал“ за Тел Авив.
Американскиот „Њусвик“ го споредува Израел со Русија: Израелците мобилизираа рекордни 300.000 резервисти за само 48 часа – подвиг за кој на Русите им требаше повеќе од еден месец, иако на војниците за едногодишен договор им нудеа привлечни 2.080 долари месечна плата.
Откако претседателот Владимир Путин објави делумна мобилизација за војната во Украина, рускиот министер за одбрана, Сергеј Шојгу, на 21 септември минатата година рече дека Русија цели на 300.000 резервни и поранешни војници – што претставува 0,2 отсто од населението на Русија, значително помалку отколку во Израел. Делумната мобилизација е завршена на 28 октомври 2022 година, соопшти министерот Шојгу.
Наредбата на Путин за делумна мобилизација се смета за неуспех, наведува во својот осврт „Њусвик“, поради, како што се истакнува во текстот, огромниот број Руси кои побегнале во странство.
Во деновите по прогласувањето на делумна мобилизација, 370.000 Руси ја напуштија земјата. Помеѓу февруари 2022 година и јули 2023 година, најмногу Руси преминале во Казахстан, потоа во Србија, Ерменија, Турција, членките на Европската унија, Израел, Црна Гора, Грузија и Соединетите Американски Држави, напиша весникот „Економист“ во август оваа година.
