Компанија од Саудиска Арабија („Ал Шиди Груп“), планира да изгради големо затворено одморалиште во близина на Улцињ.
Според пишување на босански и црногорски медиуми, постои сомневање дека сопственикот на таа фирма бил вмешан во перење пари во Босна и Херцеговина.
Како што јави весникот „Побједа“ од Подгорица, на крајот на минатата недела бил потпишан меморандум за разбирање меѓу црногорската влада, Општина Улцињ и саудиската фирма.
Со Саудијците се разгледува можноста за изградба и развој на туристички комплекс на делот на р’тот Мавријан во Улцињ.
Оваа саудиска компанија дошла во Босна и Херцеговина пред 15 години, преку поранешниот член на Претседателството на БиХ, Бакир Изетбеговиќ, со кого претседателот на групацијата, Сулејман Ал Шиди, наводно е близок пријател.
Ал Шиди, одделни медиуми го поврзуваат со перење пари во БиХ, како и со „скривање на косопственикот на ‘Сараево Сити Центар’“.
Сараевски „Дневни аваз“ на крајот на јули годинава објави дека Ел Шиди, без одобрение на Надзорниот одбор, вкупната добивка од „Магрос велетрговија“ од 36 милиони евра ја извлекол преку заеми на други негови компании.
Притоа, како што се наведува, купил 59,72 отсто од капиталот на таа компанија преку директна непосредна спогодба за 677.000 евра, преку неговите компании со седиште во Ријад и Зеница.
Потоа за 303.000 евра купиле удел од 67 отсто во „Магрос експорт-импорт“.
Помалите акционери во „Магрос“, кои сега имаат само 0,37 отсто удел во компанијата, а на кои мнозинскиот сопственик сега им нуди откуп на акциите по 75 евра за една, што е 50 отсто повеќе од книговодствената вредност, тврдат дека Ал Шиди преку истанбулска компанија (Itimat Danismanlik Hizmelteri Insaat Mobilya San) вадел пари од сараевска фирма, што има одлики на перење пари.
Во 2009 година, Ел Шиди ја започна изградбата на „Сараево Сити Центар“ во Марин двор, со вкупна површина од 100.000 метри квадратни, кој беше отворен во 2014 година и во кој, според саудискиот инвеститор, се инвестирани 130 милиони евра.
Истражувачкиот тим на БИРН, Александар Јанев и Младен Обреновиќ, тврдат дека не се знае кој стои зад компанијата која држи една третина од основачкиот капитал на „Сараево Сити Центар“, а е регистрирана на Кајманските Острови.
Вистинските сопственици се наводно инвеститори од Бахреин.