Иранската државна телевизија го прогласи денес досегашниот претседател Хасан Рохани за победник на претседателските избори, што значи дека пред него е уште еден четиригодишен мандат во кој ќе настојува да ја прошири слободата и достигнувањето на својата земја во надворешниот свет.
Телевизијата му ја честиташе победата на Рохани врз основа на речиси сите преброени гласови, после вчерашниот прв круг од претседателските избори, а ако и конечните резултати останат непроменети, нема да има потреба од одржување на втор круг.
Според претходно објавените прелиминарни резултати од гласањето, Рохани води со 22,8 милиони добиени гласови од вкупно 38,9 милиони колку што до сега се избројани, а официјални лица наведуваат дека гласале нешто повеќе од 40 милиони луѓе.
Неговиот главен ривал, претставникот на конзервативната струја, Ебрахим Раиси освои 15,5 милиони гласови, соопшти иранското Министерство за внатрешни работи.
Другите двајца кандидати, поранешниот министер за култура Мустафа Мирсалим и Мустафа Хашемитаба, освоија 297.000 односно 139.000 гласови.
Заменикот министер за внатрешни работи Али Асгахар Ахмади на конференцијата за новинари рече дека на изборите гласале повеќе од 40 милиони Иранци или околу 70 проценти од граѓаните.
Како што е наведено, гласањето било продолжено до полноќ по локално време, а гласачите во долги колони чекале да ја исполнат граѓанската обврска.
Конечниот резултат од изборите ќе бидат познати подоцна во текот на денот.
Рохани (68) на изборите во 2013 година освои 51 отсто од гласовите. Својата политичка иднина ја стави на коцка отварајќи го Иран кон надворешниот свет и совладувајќи го противењето на радикалните политичари за постигнувањето на нуклеарната спогодба во замена за ослободување од погубните санкции, наведува АП.
Ниеден претседател не успеал да освои реизбор од 1981 година, кога ајатолахот Али Хамнеи, сегашниот врховен водач и најмоќен човек во Иран, стана претседател.
Претседателот на Иран е втота најмоќна фигура во иранскиот политички систем и подреден е на врховниот водач на земјата, кој има конечен збор над сите државни прашања.
Путин му честиташе на Рохани за победата
Рускиот претседател Владимир Путин му упати на Хасан Рохани телеграма со честитки за убедливата победа на претседателските избори во Иран, објави прес службата на Кремљ.
„Првиот човек на Руската Федерација ја потврди подготвеноста да продолжи со заедничките напори кон ширење на соработката меѓу Русија и Иран, како на билатерален така и на меѓународен план“, стои во соопштението на Кремљ.
Могерини ја пофали убедливата победа на Рохани
Високата претставничка на ЕУ за надворешна политика и безбедност, Федерика Могерини ја повали убедливата победа и реизборот на иранскиот претседател Хасан Рохани и се заложи за тоа Унијата да продолжи да работи на примена на нуклеарната спогодба со Иран од 2015 година, пренесува АФП.
„Иранците покажаа страсно учество во политичкиот живот на својата земја. Му честитам на претседателот Рохани на добиениот мандат“, порача Могерини на Твитер.
Таа додаде дека „ЕУ е подготвена да ја продолжи работата на полна примена на нуклеарната спогодба, со билатерално ангажирање, на регионалниот мир и исполнување на очекувањата на сите луѓе во Иран“.
