Две лица се убиени во центарот на Париз во престрелка до која дојде денеска во раните вечерни часови на прочуената авенија Елисејски полиња.
Како што јавуваат француските медиуми, засега неидентификуван напаѓач почнал да пука кон полицајци и еден на место го убил, а уште двајца тешко ранил. Полицијата возвратила на нападот и, како што се наведува, го неутрализирала напаѓачот.
Одговорноста за нападот ја превзеде ИСИС. Терористичката организација објави дека стои зад инцидентот преку својата новинска агенција Амак.
„Извршител на нападот на Елисејските полиња во центарот на Париз е Абу Јусеф, Белгијанец, и тој е еден од борците на Исламска држава“, се наведува во соопштението, пренесува АФП.
Постојат индикации дека во нападот учествувале повеќе лица, па во тек е голема потрага.
Според првите информации, инцидентот започнал во близина на популарната стоковна куќа „Маркс и Спенсер“, а напаѓачот наводно стрелал со калашников кон полициско комбе.
На местото на настанот пристигнаа голем број дополнителни полициски сили.
Претседателот на Франција, Франсоа Оланд кусо после инцидентот свика итен состанок, после кој потврдил дека се уверени дека во прашање е терористички напад, како и дека утре изутрина ќе направи разговор со безбедносните служби.
Ројтерс јавува, повикувајќи се на извори од париската полиција, дека станува збор за смислен напад на полицајци и, судејќи според се, дека се работи за терористички чин. Истата агенција, меѓутоа, известува дека постои можност да се работи за вооружен грабеж.
Исто така, портпаролот на француското министерство за внатрешни работи, Пјер Анри Бранде, изјави дека е прерано за да може со сигурност да се заклучи кој е мотивот за нападот.
Бранде ги демантираше информациите дека напаѓачот е идентификуван.
Во меѓувреме стигна вест за нова претсрелка, до која во близина на Елисејските полиња дошло нешто после 22 часот.
Полицијата на сите граѓани им упати апел да го одбегнуваат подрачјето каде што се случил вооружениот инцидент. Веднаш е покрената сигурносна операција од големи размери па подрачјето го надлетуваат неколку хеликоптери.
Објавен е налог за апсење на едно лице кое учествувало во нападот, а за кое се верува дека во Франција пристигнало со воз од Белгија.
Поедини француски медиуми и странски новинари поделија фотографија за која се сомнева дека на неа е напаѓачот по кој што се трага и наведуваат дека неговото име е Јусуф ел Осри, како и дека таа стигнала од полициски извори.
Во моментот кога почнаа да пристигнуваат првите извештаи од Париз, во Вашингтон американскиот претседател Доналд Трамп со италијанскиот премиер Паоло Џентиљони држеле заедничка прес конференција. Трамп веднаш изјави дека му се чини оти во Франција е изведен терористички напад и изрази сочуство за жртвите.
