Властите во Пекинг вчера официјално поднесоа жалба до Светската трговска организација поради дополнителните царини на Европската унија за електричните возила произведени во Кина.
Министерството за трговија на Кина, според сопствените зборови, со жалбата сака да ги заштити развојните интереси на индустријата за електрични возила и смета дека високите царини на Европската унија се пример за трговски протекционизам, пренесува Блумберг.
„Кина смета дека конечната одлука на ЕУ за мерките против субвенционирање нема фактичка и правна основа, дека ги прекршува правилата на Светската трговска организација и претставува злоупотреба на трговските правни лекови“, се вели во соопштението на портпаролот на кинеското министерство.
Официјален Пекинг ја повика Европската унија „да се соочи со своите грешки и веднаш да ги исправи своите незаконски практики“.
Европската комисија одлучи, по неколкумесечна истрага и преговори со кинеската страна, да воведе царини за увоз на електрични возила произведени во Кина, кои стапија на сила на 31 октомври и ќе важат во следните пет години, пренесуваат медиумите.
Извор/Фото: МИА
