Мјанмар во 2023 година стана најголемиот светски производител на опиум, претекнувајќи го Авганистан, кој, со враќањето на Талибанците на власт, тргна во сузбивање на трговијата со дрога, се вели во извештајот на Обединетите нации објавен денес.
Оваа година, според проценките, Мјанмар произведе 1.080 метрички тони опиум, неопходен за производство на хероин, се наведува во документите на Канцеларијата на ОН за дрога и криминал (UNODC).
„Златниот триаголник“, граничната област меѓу Мјанмар, Лаос и Тајланд, веќе долго време е средиште за производство и криумчарење на дрога, посебно на метамфетамин и опиум.
Севкупната проценета вредност на „економијата со опијати“ на Мјанмар скокна на 1 до 2,4 милијарди долари, што е еквивалентно меѓу 1,7 и 4,1 отсто од БДП на земјата во 2022 година, се додава во извештајот.
Минатата година во Мјанмар беа произведени 790 метрички тони опиум.
Економијата на земјата во голема мера e погодена од конфликти и нестабилност откако во 2021 година власта ја презеде војската, заради што многу земјоделци поради лошиот пристап до пазарите, оштетената државна инфраструктура и високата инфлација, се свртеа кон одгледување афион.
Проценетото производство на опиум за периодот 2022-23 година беше на највисоко ниво во изминатите 20 години, посочува УНОДЦ.
Одгледувањето афион во Мјанмар стана пософистицирано, со зголемени инвестиции и со примена на подобри методи, вклучително и подобрено наводнување и можно употреба на вештачки ѓубрива за зголемување на приносот.
Во Авганистан, Талибанците по враќањето на власт ветија дека ќе стават крај на илегалното производство на дрога, и дотогаш најголемиот светски производител на афион му го отстапи местото на Мјанмар.
Одгледувањето афион во Авганистан за кратко време доживеа целосен колапс.
Имено, во 2022 година афион во Авганистан се садеше на површина од 233.000 хектари, додека во 2023 година оваа површина се намалила на 10.800 хектари.
(Фото: Анадолу Агенција)
