Војските на Јужна Кореја и Соединетите Американски Држави денеска ги започнаа своите пролетните вежби со двојно поголем број војници во споредба со минатата година, изјавија официјални лица, додека сојузниците се обидуваат подобро да се спротивстават на се поголемите нуклеарни и ракетни закани на Северна Кореја.
Вежбите насловени „Штит на слободата“, што ќе траат десет дена, од 4 до 14 март, се одржуваат во време кога Северна Кореја продолжува да ги развива своите нуклеарни капацитети со тестирање ракети и други оружја. Тие ќе бидат први откако Пјонгјанг во ноември лани го укина меѓукорејскиот воен договор од 2018 година.
Сојузничките воздухопловни сили, исто така, ја започнаа петдневната годишна вежба „Шангмае“, на ниво на баталјон, соопшти денеска Министерството за одбрана во Сеул.
„Годинешниот ‘Штит на слободата’ вклучува двојно поголем број војници од двете страни во споредба со минатата година, а комбинираната теренска обука ќе вклучува воздушни напади и воздушни удари“, објави началникот на здружениот штаб на Јужна Кореја.
„Вежбите примарно се насочени за да ги неутрализираат нуклеарните закани на Северна Кореја, вклучувајќи и идентификување и погодување на крстосувачки проектили, за кои Пјонгјанг посочи дека можат да носат нуклеарни боеви глави“, истакна портпаролот на воените сили на Јужна Кореја, полковник Ли Сунг-Јан.
„Сценариото за нуклеарен напад ќе биде интегрирано во летните вежби“, додаде тој.
Пјонгјанг луто реагираше на сојузничките вежби, нарекувајќи ги проби за нуклеарна војна. Сеул и Вашингтон велат дека вежбите се одбранбени и се одговор на заканите од Северот.
(Фото: Илустрација – Манан Ватсјајана / АФП)
