Околу 55 параграфи, со сите отворени прашања, сместени на 20 страници, ги содржи грчката нацрт-предлог спогодба меѓу Македонија и Грција, соопшти грчкото радио „Атина 984“.
Нацрт предлогот е подготвен од грчкото МНР, опширно разгледан меѓу премиерот Алексис Ципрас и Никос Коѕијас, а ги содржи точките што ги најави и самиот шеф на грчката дипломатија.
Во однос на имињата што се вклучени, радиото во текстот коментира дека Горна Македонија, е „фаворит“ за Атина, но без превод, „нешто што многу тешко ќе биде прифатено од другата страна“.
Судејќи според информациите во грчките медиуми од изминатиот период, Грција не само што преферира името да биде непреведено, туку и да биде слеано, напишано во еден збор.
Друга точка од грчките барања е и промена на Уставот, нешто што го споменува и новинарката од радиото на општина Атина.
„Прашањето за промена на името како и други теми што се однесуваат на Уставот на соседната земја за негова промена е едно од основните барања на Атина како „гаранција“ за имплементација на ерга омнес за употребата на новото име, односно да биде и за внатрешноста и за надвор. Уставната промена бара мнозинство во Собранието на ПЈРМ, нешто што го нема владината коалиција на СДСМ и албанската ДУИ – објавува радиото „Атина 984“.
Новинарката коментира дека постојат контрадикторни информации за тоа дали нацрт спогодбата е доставена до македонската страна или не. Во грчките медиуми, за време на викендот се појавија информации од американски извори дека Атина веќе го испратила предлогот.
„Според некои информации грчките предлози веќе се испратени од 12 март, додека, пак, според дипломатски извори од ПЈРМ, се уште не е испратена нацрт спогодбата, која што, како што велат, ја очекуваат со пристигнувањето на грчкиот министер за надворешни работи во четврток. Сепак, критично е дали ќе има навистина напредок во разговорите што ќе ги има Коѕијас со неговиот колега Димитров во пресрет на средбата со специјалниот претставник на Обединетите нации, Метју Нимиц, планиран за 27 март, повторно во Виена – објавува Атина 984.
Во однос на информациите во грчките медиуми од изминатите денови, дека нацрт спогодбата е доставена до Македонија, македонски дипломатски извори велат дека грчките предлози не се пристигнати и очекуваат нив да ги достави самиот Коѕијас при неговата посета на Скопје.
За 27 март, објавен во македонските и грчките медиуми, како датум кога ќе се одржи новата средба на шефовите на дипломатиите со медијаторот Нимиц, не постои официјална потврда ниту од Скопје ниту од Атина.
Патувањето на шефот на грчката дипломатија во Македонија, со лет директно од Атина за Скопје, веројатно ќе биде на 22 март, а радиото „Атина 984“ коментира дека тогаш одново ќе започнат критичните разговори за решавање на разликите околу името.
„Дипломатски извори во Атина, изразуваат загриженост во пресрет на средбата на двајцата министри следниот четврток во однос на она што се чини дека го изјавил министерот за надворешни работи на соседната земја разговарајќи со европски функционери. Господинот Димитров, според информациите се чини дека ги карактеризирал „апсурдни“ некои од грчките позиции, јавува грчкото радио на официјалниот сајт.
