Британскиот крал Чарлс Трети пристигна вчера во Германија, во својата прва странска посета во својство на монарх, а во Берлин беше пречекан со воени почести пред Бранденбуршката порта, каде што го поздрави неговиот домаќин, германскиот претседател Франк-Валтер Штајнмаер.
После краткиот разговор со граѓаните, Чарлс Третисе упати кон претседателската резиденција, дворецот Белви, на разговори со германскиот претседател и претставници од политиката, науката и бизнисот на тема „енергетска транзиција и одржлив развој“.
Пред мноштво насобрани, британскиот крал е првиот државен гостин кој некогаш бил пречекан со воени почести пред берлинската знаменитост.
Британскиот крал и неговата сопруга пред тоа на аеродромот во Берлин беа пречекани со топовски салва, после што се упатија кон центарот на градот.
За време на тридневниот престој Чарлс Трети треба да се сретне и со германскиот канцелар Олаф Шолц, во четврток, и, делумно на германски јазик, да се обрати пред во парламентот, во Бундестагот.
Во рамките на програмата, британскиот крал треба да ги посети британските војници во Бранденбург и да направи обиколка на кампот за украинските бегалци, а во петок заедно со германскиот претседател да го посети Хамбург.
Ова е прва посета на Чарлс Третиво странство. Како прво одредиште беше планирана Франција, но посетата е одложена поради немирите што ја тресат оваа земја последниве денови.
Во пресрет на посетата на Чарлс, историчарите ги нагласуваат повеќекратните врски на британското кралско семејство со Германија, од која потекнува династијата Виндзор.
Пра-прадедото на Чарлс, принцот Алберт фон Саксен-Кобург, сопруг на британската кралица Викторија, според британскиот историчар Нил Мекгрегор е голем пример за актуелниот британски крал.
„И предците на Чарлс беа ориентирани кон Германија како симбол на модерното“, рече Мек Грегор.
Династијата Виндзор се до 1917 година се нарекувала Заксен-Кобург-Гота, но поради антигерманското расположение во 1917 година заради Првата светска војна, кралот Џорџ Петти го сменил името на династијата.
Германските медиуми посветија големо внимание на посетата на британската кралска двојка, која, според најавите, ќе биде следена на секој чекор од престојот во Германија.
(Фото: Ројтерс / Анергет Хилсе)
