Денешниот датум и официјално го означува заминувањето на Ангела Меркел од функцијата канцелар во Берлин, по четири последователни мандати и 16 години на кормилото на државата. Два и пол месеци по сојузните парламентарни избори во Германија, оваа земја доби нова владејачка коалиција, предводена од социјалдемократот Олаф Шолц. На Меркел и престанува и обврската технички да ја води владата.
Во понеделникот вечерта, од своите најблиски соработници во Кабинетот доби букет цвеќе и шише сортно вино. Многу новинари кои ја следеа за време на извршувањето на највисоката државна функција, прокоментира дека „нејзиниот тим можел да се сети на пооригинален подарок по повод заминувањето“.
Таканаречениот семефор кабинетот на Шолц, освен неговите „црвени“ социјалдемократи, ќе го сочинуваат и „жолтите“ либерали и Партијата на зелените. Покрај 15-те министри, во владата ќе има и човек задолжен за организација на работата на кабинетот, некој вид државен секретар, Волфганг Шмит. Најмногу ресори, шест, и припаднаа на Социјалдемократската партија (СПД), вклучувајќи го и Министерството за одбрана, на чие чело е Кристин Ламбрехт, трета дама, после двете претходнички од редовите на демохристијаните, Урсула фон дер Лајен и Анегрет Крамп Каренбауер.
СПД го доби и здравството, најчувствителниот внатрешен ресор во пандемијата со корона вирус, кој либералите и Зелените успешно го одбегнаа како „врел компир“. на негово чело ќе биде угледниот епидемиолог Карл Лаутербах. Дама, за првпат, ќе биде на чело на Министерството за внатрешни работи – Ненси Фезер.
Зелените, кои го добија еден од најделикатните ресори, надворешната политика, а ќе ја води кандидатката за канцелар, Аналена Бербок, имаат пет министерства, а на чело на три од нив ќе бидат жени. Освен Бербок, тука се и Штефи Лемке (екологија) и Ане Шпигл (семејство). Германецот од турско потекло Џем Оздемир е задолжен за земјоделие, а потпретседателот на Зелените, Роберт Хабек за стопанство и клима.
Либералите поминаа со најмалку ресори, четири, но нивниот лидер Кристијан Линднер ќе биде министер за финансии. од него, не само партиските колеги, туку и повеќето Германци очекуваат многу, а пред се, „пополнување“ на дупките кои, во инаку стабилниот финансиски систем ги направи пандемијата со корона вирусот.
Германските демохристијани, после деценија и пол, станаа опозициска партија. Многу меѓу нив, особено младите политичари, се залагаа за тоа, после изборниот дебакл, оваа партија да се повлече од власта, односно, да ја одбие секоја можност да се најде во кабинетот на Шолц.
„Треба да се престроиме до новите избори, а во меѓувреме, да ја критикуваме власта“, порачуваат од Христијанско-демократската унија (ЦДУ).
(Фото: АП)
