Белорускиот лидер, Александар Лукашенко, со декрет забрани зголемување на цените во неговата земја.
„Од 6 октомври секое поскапување е забрането.
Забрането!“, рече тој на вчерашниот владин состанок.
„Не од утре, туку од денес“, додаде тој.
Целта на наредбата, според белорускиот автократ, е да се осигура дека никој не може да го искористи ова време за да ги зголеми цените.
Оние кои ќе го прекршат декретот „ќе бидат веднаш уапсени и кривично гонети“.
Лукашенко целосно не ја исклучи можноста дека поскапувања во некои области ќе бидат потребни во иднина, доколку тие бидат официјално одобрени.
Според Државниот завод за статистика, инфлацијата во Белорусија во август изнесувала 17,9 отсто во однос на истиот месец лани.
Особено, се зголемија цените на храната.
Според предвидувањата на белоруските економски експерти, стапката на инфлација до крајот на годината би можела да се искачи на 19 отсто.
(Фото: ТАСС)
