Македонија очекува на самитот на НАТО, кој ќе се одржува утре и задутре во Брисел да ја добие долгоочекуваната покана за членство. Земјава од 1999 година е кандидатка, изработи рекордни 17 акциони планови за членство, најмногу од сите досегашни кандидатки, континуирано спроведуваше реформи во сферата на безбедноста, а надминат е и спорот за името со Грција, откако на 17 минатиот месец во Псарадес беше потпишан договорот меѓу двете земји.
Македонија очекува оваа недела свечено да биде поканета да пристапи кон најголемиот воено-политички сојуз во светот, со што ќе се отвори патот да стане 30. земја-членка. Владата со оптимизам гледа на процесот на конечно придвижување на нашето членство во НАТО.
Од друга страна, пак, грчките медиуми пишуваат дека утре во Брисел за време на самитот, се очекува да биде нагласен условот- членството на Македонија во Алијансата да зависи од исполнувањето на договорот за името.
Според грчките медиуми, овој услов ќе биде истакнат во членовите 59 и 60 од декларацијата на НАТО.
