Генералниот секретар на НАТО Јенс Столтенберг со писмо ја информирал министерката за одбрана Радмила Шекеринска дека е прифатено барањето на Владата, Република Македонија да биде дел од Програмата на НАТО за унапредување на образованието во одбраната, соопшти денеска Министерството за одбрана.
Во писмото до министерката Шекеринска, генералниот секретар на Алијансата, Јенс Столтенберг, посочил дека е добредојдено барањето за приклучување кон оваа програма и дека во следниот период тим од Секторот за политички прашања и безбедносна политика на НАТО ќе организира студиска посета на Македонија за утврдување на поддршка која е потребна.
„Врз основа на успехот на програмата досега, убеден сум дека таа ќе ги зајакне вашите институции за образование во одбраната, особено вашата Воена Академија.
„Образованието е критичен фактор на трансформација и нашата соработка во оваа област ќе ги поддржи и унапреди вашите напори за реформи во одбраната – стои во писмото од генералниот секретар на НАТО.
Тој наведува дека со нетрпение ја очекува заедничката засилена соработка и продолжувањето на дискусија за време на посетата министерката Шеќеринска на седиштето на НАТО во Брисел на 27 септември.
Програмата за унапредување на образованието во одбраната е моторот зад реформите во одбраната, давајќи соодветна практична поддршка на земјите во развојот и реформите на нивните професионални воено-образовни институции.
Таканаречената ДИП-програма од 2013 досега има организирано над 680 настани и има ангажирано над 1.240 експерти од Алијансата.
Оваа програма е под водство на САД, Канада, Словачка, Шпанија, Швајцарија, Чешка, Франција, Италија, Литванија, Полска, Бугарија, Романија, а поддржана од сите земји-членки на Алијансата и конзорциумот на Партнерството за мир.
Сега за прв пат пристап до програмата добива и Република Македонија, посочуваат од Министерството за одбрана.
