Популарноста на британскиот премиер Борис Џонсон и неговите владејачки конзервативци опадна по серијата скандали и повеќето испитаници мислат дека тој треба да си замине, покажа анкетата објавена денеска.
Џонсон во последните неколку недели беше на удар на критики на неколку фронтови, од обнова на неговиот стан на Даунинг стрит до обвинувања дека тој лично интервенирал од Кабул, среде хаотичната евакуација во август, да се извлечат домашни миленици.
Најмногу, се чини, му наштети веста дека неговите соработници се забавувале во Даунинг стрит за време на божиќните празници во 2020 година, кога таквите собири поради пандемијата беа забранети.
Анкетата на весникот „Обсервер“ покажа дека поддршката за конзервативците, кои што имаа голема предност во анкетите по убедливата победа на изборите во 2019 година, падна за четири отсто, и сега таа изнесува 32 отсто, а популарноста на опозициската Лабуристичка партија скокна на 41 отсто, најмногу од 2014 година.
Личниот рејтинг на Џонсон е, исто така, најнизок од изборите и неговата работа сега не ја одобруваат 35 отсто од испитаниците, 14 отсто повеќе од пред две недели.
Дури 57 отсто од испитаниците веруваат дека премиерот треба да поднесе оставка, за разлика од 48 отсто пред две недели.
Аналитичарите истакнуваат дека се повеќе конзервативци се незадоволни од водството на Џонсон и проценуваат дека следната недела повеќе од нив би можеле да гласаат против новите мерки за борба против ширењето на „омикрон“ видот на корона вирусот.
„Резултатите од нашата анкета се навистина драматични со катастрофален пад на популарноста и на конзервативците и на премиерот“, рече Адам Драмонд од агенцијата „Опиниум“.
Но, додаде, дека Џонсон е „кралот на враќањето“, човек кој и порано знаел да се извлече од слични ситуации.
(Фото: АП)
