Вулканот на исландскиот полуостров Рејкјанес еруптираше вчера рано наутро и лава се излеа во рибарскиот град Гриндавик. Разорната лава сруши најмалку три куќи во Гриндавик, според локалните медиуми, со потенцијал за уште поголемо уништување, јави Би-Би-Си.
Главната улица во Гриндавик е пресечена од изливањето на лава.
Исландски функционер ја опиша ерупцијата на вулканот како „најлошо можно сценарио“ и покрај повеќемесечните подготовки.
Директорот на цивилната одбрана, Видир Рејнисон, рече дека бариери биле изградени северно од Гриндавик пред првата ерупција во декември.
Но, главниот ток на лавата излезе од планираното „корито“, а новата пукнатина што се појави во нив е „најлошото можно сценарио“.
Една од опциите што се разгледува е употреба на пумпи за ладење на лавата со морска вода за да се ограничи штетата, пренесува Скај Њус.
Гриндавик, град со 3.800 жители, се наоѓа на околу 50 километри југозападно од Рејкјавик, главниот град на Исланд.
Како што пренесува Би-Би-Си, лавата во тој град голта куќи и згради откако се отвориле две пукнатини. Целото население е евакуирано од градот.
Исландската метеоролошка служба (ИМО) соопшти дека пробивањето на бариерите на некои места и овозможило на лавата да стигне до градот, што предизвикало пожар во некои куќи и згради.
Вулканологот Робин Ендрјус вели дека оваа ерупција е „екстремно опасна и штетна ситуација“, особено сега кога лавата навлегла во градот.
Тој за Би-Би-Си изјави дека протокот на лава „не покажува знаци на забавување“, додавајќи дека во моментов не е можно да се процени степенот на штетата.
Ендрјус предупреди дека последиците од ерупцијата можат да бидат „прилично проблематични“ за луѓето со постоечки респираторни проблеми, бидејќи вулканската активност ослободува гасови како сулфур диоксид, кој ги иритира кожата, очите, носот и грлото.
„Денес е црн ден за Гриндавик и црн ден за цел Исланд, но сонцето повторно ќе изгрее….“, рече премиерката Катрин Јакобсдотир, која најави дека владата ќе се состане за да договори мерките за граѓаните кои се евакуирани.
Во своето вчерашно обраќање до нацијата, исландскиот претседател, Гудни Јоханесон, повика на солидарност со оние кои не можат да останат во своите домови поради ерупцијата на вулканот.
Јоханесон рече дека очекува ситуацијата да се смири.
Вчерашната ерупција беше петта што се случи долж полуостровот Рејкјанес од 2021 година, а на ерупцијата во декември и претходеа силни земјотреси.
(Фото: Халдор Колбеинс/АФП)
