Поранешниот американски претседател, Доналд Трамп, вчера пристигна во Мајами за да се соочи со федерално обвинение, додека резултатите од новите анкети кои ги спроведоа Ројтерс и Ипсос покажуваат дека судската постапка не им наштети на неговите изгледи на изборите следната година.
Трамп треба да се појави во федералната судница во Мајами денеска во 15.00 часот по локално време.
Обвинет е за незаконско задржување на доверливи документи и лажење на службениците кои се обиделе да ги вратат, но Трамп тврди дека е невин и се обврза дека ќе продолжи со кампањата за изборите во ноември 2024 година.
Трамп, кој утре го слави својот 77-ми роденден, пристигна во Мајами во 14.54 часот по локално време со приватен авион.
„Се надевам дека целата земја гледа што и прави на Америка радикалната левица“, напиша тој на својата социјална мрежа Социјална вистина (Truth Social) пред да отпатува од Њу Џерси.
Обвинението против Трамп не влијаеше на неговата популарност меѓу републиканските гласачи.
Анкетите на Ројтерс и Ипсос, чии резултати беа објавени во понеделникот, покажа дека 81 отсто од републиканците веруваат дека обвинувањата против Трамп се политички мотивирани.
Исто така, резултатите покажаа дека Трамп е фаворит за номинација на Републиканската партија.
Околу 43 отсто од луѓето кои се сметаат републиканци сметаат дека Трамп е кандидат кого го преферираат, во споредба со 22 отсто, кои го избраа Рон Де Сантис, гувернер на сојузната држава Флорида.
Трамп на почетокот на мај водеше пред Де Сантис со 49 наспроти 19 отсто, но тоа беше пред Де Сантис официјално да ја објави својата кандидатура.
Посебниот обвинител Џек Смит го обвини Трамп за земање илјадници документи кои содржат некои од најкласифицираните информации за националната безбедност откако ја напуштил Белата куќа во јануари 2021 година и ги чувал на неговиот имот Мар-а-Лаго во Флорида, според обвинението објавено минатата недела.
Трамп е првиот поранешен или сегашен претседател кој се соочува со кривичен прогон, но правните експерти велат дека тоа не го спречува да се кандидира или да ја преземе функцијата претседател дури и ако биде прогласен за виновен.
Трамп го обвинува демократскиот претседател Џо Бајден дека ги организирал обвинувањата против него за да наштети на неговата предизборна кампања.
Бајден се огради од случајот и одбива да го коментира.
(Фото: Ројтерс)
