Шестмина се убиени, а осум ранети во џамија во Квебек, во оружен инцидент кој канадскиот премиер го окарактеризира како „терористички напад“
Најмалку шест луѓе загинаа, а осум се ранети во оружениот напад што вчеравечер се случи во Исламскиот културен центар, во Квебек, Канада.
Нападот во една од двете џамии во Исламскиот центар за кој канадскиот премиер рече дека е терористички чин, го извршиле три лица, кога граѓаните се собрале на вечерна молитва, изјавиле сведоци.
Полицијата го потврдила бројот на загинатите и нападот го разгледува како тероризам.
Две лица се во притвор, а од полицијата наведуваат дека не веруваат дека уште осомничени се на слобода.
Од полицијата исто така истакнуваат дека областа во која нападот се случи е „под контрола“.
Нема информации за уапсените, истрагата е во тек.
Канадскиот премиер Џастин Трудо изјави дека станува збор за „терористички напад“.
Како што вели, веста за нападот ја прими со „голем шок, тага и бес“.
Го осудуваме терористичкиот напад на муслиманите. Додека властите и понатака истражуваат, а деталите треба да се потврдат, со тешко срце гледаме на гнасни чинови на насилство. Различноста е наша сила, а верската толеранција е вредност за која ние Канаѓаните многу се држиме“, Џастин Трудо
Сведок на настанот за „Ројтерс“ изјави дека во нападот учествувале „до три напаѓачи“.
Тие, исто така, јавија дека тешко вооружена специјална единица на полицијата влегла во џамијата.
Од Исламскиот центар на Фејсбук се заблагодарија на јавноста за „стотиците пораки за поддршка“ и ги замолија граѓаните да не шират гласини.
Претседателот на џамијата Мохамед Јангуи, кој не бил внатре во џамијата при пукањето, изјави дека повредените се однесено во повеќе болници во Квебек.
„Што се случува тука, ова е варварски“, рече тој.
Би-Би-Си нагласува дека во јуни минатата година пред истата џамија како „подарок“ е пронајдена одсечена свинска глава со порака „довидување“.
https://www.youtube.com/watch?v=uD2vk_fNR9c&feature=youtu.be
